المندي

دي الوصفة الكنت ناوية انزلها امس.. الليلة اعتبروها وصفة الوداع، تاني شهر كده وبرجع… المندي

اول شي تجيبي قطع الدجاج… انا للأسف كان عندي كرعين من غير جلد ولا عضم.. لما يكون فيها عضم الذ .. بس كنت عايزه اخلص منهم طوّلوا عندي… نبهّرهم بي ملح وكركم وقرفة مطحونة وكزبرة ناشفة وفلفل… قلبيه تمام خلي البهارات تتوزع كويس

بعداك جيبي ليك حلّة تكون بتدخل الفرن… كده بتقللي العدة البتستخدميها.. لو ما عندك تبدي في الحلة ولما تجي لمرحلة الفرن استخدمي صينية فرن… انا مستخدمة حلّتي دي، فقدت يدينها الاتنين في حادث اليم.. لكن بقت معاي تمام للمندي

قطعي ليك بصلة كبيرة او بصلتين صغار… قطعيها مربعات.. وكبي شوية زيت في الحلة وقلبيه تمام لمن يذبل… بعداك ضيفي شمار الفول وملح وقلبي شوية تاني

بعد شوية كبي فيهم كبايتين رز بسمتي… احلى بالرز البسمتي .. لكن لو ما عندك ممكن المصري برضه ينفع… يا حلوات، لما تكون الحلة واسعة دايما الرز بستوي احسن لانه بكون ماخد راحته.. لو عملتيه في حلة ضيقة احتمال انه يعجّن بكون اكبر…قلّبي الزر كويس مع البصل والبهار… واتأكدي انه كل رزّاية اتغلّفت بالزيت.. كده بتضمني انه الرز يطلع مفلفل… بعداك كبي مويتك… لو الرز بستمي، ادي لكل كباية رز كباية وتلت موية… لو الرز مصري كبي موية حاره، تقريبا لكل كباية رز كوب ونص موية..

يلا بعداك ضيفي قطعتين ليمون اسود، وصفقتين ورق غار وعودين قرفة… واظبطي الملح… لو ما عندك الغار والليمون، اصله ما ضروري .. انا عادي بعمل من غيرهم.. وبطلع لزيز جدا… انتظري الموية تغلي، وأطفي النار وغطي بي فويل… لو حلّتك ما بتدخل الفرن، انقلي الحاجات كلها في صينية تدخل الفرن وغطيها بي فويل

احنا بنخلي الموية تغلي لانه الفرن بطي، كده بنساعد الحاجات تبقى أسرع.. بعداك بي سِكّين، جرّحي الفويل .. قدود كتيره.. عشان بخار الرز يطلع

رصّي الدجاج كله من فوق للفويل، القدود العملناها دي حتخلي الدجاج يستوي بالبخار بتاع الرز.. غطّي الدجاج برضه من فوق بالفويل ودخلي الحلة الفرن..
كده الحلّة بقت جواها رز ومويته، من فوقهم الفويل المقدد، من فوقه الدجاج، وبعداك غطينا الدجاج بالفويل

بعد يستوي الرز، تقريبا بحتاج نص ساعة… شيلي الفويل الفوق عشان الدجاج ياخد لون.. ولعّي فرنك من فوق.. بطلع لونه جمييييييل بسبب الكركم..

الدجاج كبيه كب في الرز… حتى الموية الطلعت منه كبيها… اخر خطوة واهم خطوة والبتفرق في الطعم.. الجمرة… جيبي صحن صغير او لو ما عندك، اعملي صحن بي الفويل.. ختي الصحن في نص الرز .. وكبي فيه حبّة زيت… وولعي ليك جمرة ارميها في الزيت… طوالي حيطلع دخان شديد خليك جاهزه وغطي الحلة بي الفويل او بي غطاها

حركة الجمرة دي بتنفع مع اي شي عايزه تديه نكهة بتاعت شيّة… ما حركة جديدة، لكن حلوه جد مع المندي.. طبعا المندي الأصلي أهله بدفنو الدجاج او اللحمة في حفرة وبنجض بي الحصاص.. يعني بكون فيه نكهة قوية بتاعت شيّة

انا بعمل معاه صوص بتاعت زبادي مع فص واحد توم وملح وفلفل وعصرة ليمون ومن فوق حبة زيت زيتون