سلطة البنجر

عملت في الفترة الفاتت دي وصفات كتيره وجهّزتها، ومن قبيل محتارة انزل شنو.. قمت اتذكرته سلطتي المفضّلة قلت انزّلها… سلطة البنجر

ما عندي اي فكرة جبته الوصفة من وين.. لكن غايته ألما اكل البنجر بالطريقة دي، مااااا اكل بنجر… اول حاجه نجيب بنجر فريش.. ونغسّله، ما تتعبوا نفسكم وتقشّروه، اسهل بعد يتسلق .. اسلقيهم تمام بي مويه نضيفه

طلعيه من المويه بعد يبرد وبي أصابعك ساي اضغطي عليه الجلد بتاعه بطلع… مويتك السلقتي فيها ديك ما ترميها.. حانزل بوست عنها بعد شويه.. اولادي قايلنها كركدي

نرجع للبنجر، زمان بتذكر انه لونه كان بضايقني لدرجة اني اصلي ما حصل ضقته.. لكن الوصفة دي خلته اكلتي المفضلة.. ميزته طبعا انه فيه كمية من الحديد.. وكويس للناس العندهم مشكلة بتاعت هيموجلوبين او دمهم ناقص.. اي شي لونه احمر كده كويس للدم، القريب والكبده والرمان.. بس كلهم مشكلتهم لو دخلوا النار.. البنجر ممكن يكون نفعه اكبر لو نجّضناه بالبخار عشان يحتفظ بي قيمته الغذائية.. قطّعيه مكعبات صغيرونة.. تقطيعه حلو شديد وساهل

بعداك جهّزي التتبيلة حقتك.. حسب كمية البنجر… اعملي زبادي ومعاه دكوة وملح وفلفل وشمار الفول وحشي ليك حبببببببببببببة بصل او ممكن نص فص توم.. وعصير ليمونه .. الليمون برضه مهم لامتصاص الحديد.. بس احنا عاملينه للطعم هنا… اتأكدي انهم اندمجوا تمام…