نجي لموية البنجر الطلعناها في الوصفة دي… نستخدمها في تلوين البيض المسلوق… واهو فرصة نتكلم عن سلق البيض
أحب اول شي اقول للحنكوشات لما يجو يقولوا بس بعرف اسلق بيض، انها كده ماااااااا قصرت ورهيبة جدا، لانه سلق البيض أبدا ما ساهل 😀
في اكتر من طريقة، لكن المشكلة الاساسية بتكون كيف البيض يتقشّر من غير ما يكون في حُفر عشان التلوين يكون حلو… اول حاجه تطلعي البيض يدفا… ما تسلقي البيض وهو بارد
جيبي حلّتك وامليها موية وغطيها وختيها في النار لحدي ما تغلي… حتى بعداك بي كُمشة نزّلي فيها البيض… ضيفي نقطتين خل عشان لو البيضة اتشقّت ما يطلع البياض برّه..
غطّي الحلة بتاعتك واظبطي المنبّه على ١٣ دقيقة… وأرخي النار وخلي البيض يتسلق
بعداك أَطْفِي النار وشيلي حلّتك وختيها تحت الماسوره وخليها تتملي وتدفق لحدي ما الموية تبرد…
بعداك جيبي تلج… كتري قدر ما تقدري.. وارميه في الموية…
كده انت جاهزه خلاص.. قشّري البيض واستمتعي كيف القشر بمرق بسهولة… بعداك البيضة اغمريها في موية البنجر.. عشان تطلع ليك البيضة اللونها بنفسجي دي…
للألوان التانية اعملي ألوان الطعام في حبة موية.. برضه احرصي انها تكون مغمورة.. ما بتاخد زمن.. بالكتير نص ساعة وبتطلع لونها كده…
بعداك سنني سكينتك شدييييييييد… وامسكي كل بيضة اقطعيها النص… بالطول..
بقوم يظهر ليك البيض جواه اصفر بعداك ابيض بعداك اللون الاخترتيه.. لاحظوا الصفار كريمي كيف ما نااااشف… ممكن تقدميه كده… او ممكن تعمليه زي الdeviled eggs … طلَّعي الصفار بي ملعقة صغيرة.. وجمّعيه كله في صحن
بعداك اعملي للصفار داك ملعقة كبيرة مايونيز وملعقة صغيرة مسطرد وكاتشاب وملح وفلفل ورشة كزبرة (عشان الزفارة).. ولو عندك مخلل خيار قطعيه دقاااااق .. ولخبطيهم سوا …
جيبي كيس عاااااادي، وكبي فيه الخلطة… لو عندك كيس حلواني ممكن تعملي بيه.. بس حيحتاج بعداك نظافة من الريحة… ختي الكيس في كباية عشان يسهل ليك الكب
بعداك البوز بتاع الكيس اقطعيه بي المقص.. لو عامله مخلل خيار، كبري الفتحة شوية
كبي من الخلطة في البيض… الخلطة حتطلع ليك كتيره.. ممكن تختي باقيها في صحن صغير..
اولادك وضيوفك كلهم حيحبوها جدا .. وحيستمتعوا بي أكلها.. انا اولادي غمض فتح أكلوها بدون عيش من شدة ما عجبتهم… انا قللت كمية المايونيز وعملته بدلها زبادي عشان تكون اخف شوية ما تكون دسمة شديد
مطبخ مريم الحسين 