المُطَبّق اكلة يمنية لزيزة جدا وتنفع خالص في الشتاء
المُطَبّق… نزل قبل كده من اكتر من اخت وانا زاتي نزلته زمان.. لكن حسيت شرحي ما كان واضح.. برضه الليلة عملته لي فيه حركة كده… وطلعت ظريفة جدا
اول حاجه نبدأ بالعجينة.. العجينة دي حقت أختنا سناء خالد زميلة في القروب… نزلتها لينا وانا اتشبكته فيها… في العجانة اسهل لكن ممكن بي يدك برضه مافي مشكلة،.. اعملي كبايتين دقيق وعليها كباية موية (مبدئيا) وملعقة صغيرة ملح….
خلي في يدك نص كباية موية وزيدي شويه شويه لحدي ما تبقى عندك عجينة ملمومة على بعضها ومتماسكة…. لو في العجّانه خليها تتعجن بمزاج… اقل شي خمسة دقايق… لو بي يدك اعجنيها فترة أطول.. اهم شي العجينة تبقى ملساء وفيها لمعة كده
بعداك كبي ليها تلت كباية زيت، اديها قلّيبه كده في الزيت وخليها ترتاح.. ضروري ترتاح اقل شي نص ساعة، انا جيت من الشغل منتهيه ختيتها في العجانه وخليتها ترتاح، مشيت رقدته لي تلاته ساعات 😀
المقدار ده بعمل ليك ستة مطبّقات، كل واحد فيهم حيكون فيها اربعة قطع.. يعني لو عندك عزومة، تعمل ليك صحن كبير محترم… بوريكم بعدين طريقتي في المُطَبّق للعزائم او رمضان…
نجي للحشوة… الحشوة العملتها عبارة عن لحمة مفرومة قلبتها في الطوة لحدي ما طلعت مويتها ونشفت، وبعداك عملته ليها شويه زيت وقطعته بصل صغار قلبته معاها، عليها كزبرة ناشفة وفلفل اخضر صغار وطماطم مقطعة وملح وفلفل وشوية توم .. وبعد قفلت النار كبيت فيها خس مقطع صغار..
بعداك نخليها تبرد كويس ونكب فيها تلاته بيضات.. زدت الملح شوية عشان ما تكون مسيخة بعد أضفت البيض
نقلب الحاجات سوا بتاعت الخلطة.. وبعد ده نستعد للتسوية… انا بعمله في صاج العواسه زاتو… لكن ممكن تستخدمي طوّة عادية او صاج الكهرباء.. خلي نارك متوسطة .. ما تكون حاره
زي ما قلنا نقسم العجين لستة كور.. متساوية.. وعشان تكون متساوية بقدر الإمكان، اقسميها العجينة نصين متساوين.. بعداك كل نص اقسميه على تلاته.. كده بتطلع ليك متساويه.. ختي كوره في المسطبة او مكان نضيف عشان تفردي فيه… خمّي معاها شويه من الزيت الختيناه داك
بعداك بي فرّادة العجين.. افرديها.. حتتفرد ليك بسهولة شديده.. لأنك ريّحتيها… افرديها رفييييييييعة.. المطبق حلاوته في رفع العجينة ده… الفي الصورة دي مفروده شديد لمن بقت شفّافه، ما مقدده والله.. .. بس اتفردت لي حلو
يلا التحدي بقى عجينة خفيفة شديد وحشوة لينة (البيض وموية الطماطم!)… بنقوم نخت مربعة من عجينة السبرنج رول الجاهزة.. شكلها مربّع بدّي المطبق شكله، وبتشيل ليك الحشوة بدون ما العجينة تنقد… وبتخليك تقدري ترفعي المطبقة من المسطبة من غير ما تتقطع ليك
نخت شريحة السبرينج رول في نص العجينة، ومن فوق ليها نخت جزء من الحشوة بتاعتنا… لاحظوا الحشوة فيها مويه عديل !
بعداك نبدأ نطبّق العجين من فوق ليها… بحيث نغطي الحشوة تماماً..
ده شكلها بعد اطبّقت تمام
يلا في الصاج بتاعك ختي شوية زيت.. وختي المطبق بي الجهة المقفلة…،يعني الجهة الحسي بي فوق بتبقى بي تحت…
بعد تستوي من تحت، اقلبيها عشان تستوي من تحت… لاحظي انت عايزه البيض الجوّه داك يستوي عشان كده النار تكون هادئة.. بعد يستوي بي تحت تاني اقلبيها بي الجهة الاولى.. للضمان بس
وختيها في الصحن وقطّعيها لأربعة قطع… وبتتاكل على طول ومن فوق ليها عصرة ليمون
يلا الحركة العملتها.. حشوتي العملتها كانت شويه… قمته عملته تلاته بيها.. والتلاته الباقين عملتهم بيتزا…
اول خطوة.. فردته العجين عادي زي المطبق.. وختيت القطعة بتاعت السبرينج رول… وبعداك من فوق ليها ملعقة بتاعت صوص البيتزا.. تفاصيل اكتر عن الصوص البستخدمه مع البيتزا بتلقوه هنا…
بعداك قطعته لي بصل صغاااار وفلفل اخضر.. كبيتهم من فوقها.. البصل صغار لاني عايزاه يستوي ما يكون صاحي لما نأكله بعدين
بعداك رصيت تلاته قطع بتاعت ببيروني.. فوق للخضار
ومن فوق ليها جبنة موزريلا .. كفّت لي لقطعة واحده، باقي القطع ختيت فيهم شيدر … محتاجين نمشي السوق احنا
وبعداك طبّقتها ونجّضتها بي نفس الطريقة العملته بيها المطبق العادي… طلعت جميلة جدا واولادي وأبوهم عجبتهم جدا.. بالذات بتّي
نجي يلا للعزومات وأوقات الزنقة، زي رمضان… طبعا المطبق لزيز جدا وحاجه راقية لو عندك ضيوف، ووجبة مفيدة في فطور رمضان.. لكن لانها عايزه شغل كتير قد ما تكون مناسبة… الحل جرّبته في رمضان الفات، وهو في التجميد … بعد تجهزي المطبق ويكون فاضل ليه التنجيض بس، رصيه في صينية ودخليها الفريزر
بعد تجمد ممكن عادي تطلعي الصينية عشان ما تاخد ليك مساحة وتختي المطبق في كيس او اي حاجه بتدخل الفريزر…. يومك التكوني عايزه تعمليه، ممكن تستخدمي صاج البيتزا عشان واسع.. خلي النار هادئة… وكبي زيت ورصّي المطبق… يتنجّض ليك زي العجب ويطلع كأنك عملتيه يا دوب
لمن تجي تنجضيه ما تخليه يسيح، من الفريزر للصاج على طول.. برضه في البداية غطيه عشان الحرارة تصل لجوّة.. وفي الاخر اكشفوه عشان يطلع مقرمش
مطبخ مريم الحسين 