اللازانيا

اللازانيا… برنامجها طويل لكن بتستاهل.. اهم شي بعلي بحبها واولادي كمان.. معاها سلطة خضراء كده.. يكون غدانا جاهز… فكرتها صوص احمر وصوص ابيض وشرائح اللازانيا اللي هي مكرونه طبعا..

اللازانيا زي ما قلت طبق محبوب في بيتي جدا.. ولأنه شغلها كتير، ما بعمل معاها شي تاني… لكن عندي كم حاجه كده بختصر بيهم البرنامج.. ولأنها دسمة جدا، بعملها مرات بي مكونات اقل شويه في الدسامة… مرّه بدل اللازانيا عملته شرايح كوسه مشويه.. وعجبتهم جدا.. مره برضه بدل الصوص الأحمر باللحمة المفرومة، عملته خليط بتاع سبانخ وجبنه، وبرضه طلعت نكهة مختلفة وعجبتهم شديد.. لكن مره مره بعمل الدسمة دي

اول حاجه نبدأ بالصوص الأحمر.. وهو عباره عن صوص طماطم معاه لحمه مفرومه.. ممكن يتعمل معاه خضار زي الذره والبازيلا.. لكن اللازانيا الأصلية مافيها غير اللحمة المفرومة… اول خطوة بنخت اللحمة المفرومة في الحلّة ومعاها حبة زيت ونقلّبها لحدي ما لونها كله يبقى رمادي وتطلّع مويتها

نكب مع اللحمة كزبرة ناشفة وقرفه مطحونه عشان تشيل الزفارة من اللحمة.. ونستمر في التقليب لحدي ما اللحمة تشرب مويتها كلها ويظهر الزيت الكبيناه قبيل داك… بعداك نحش بصلة متوسطة ونكبها ونقلبها، الزيت حينجّض البصل..

نكب لينا فصين توم مهروسات وملح وفلفل.. بعداك نكب صوص المكرونه الجاهزه.. دي واحده من اختصاراتي… الصوص الجاهز مبهّر بي بهارات بتدي اللازانيا نكهتها المميزة… كبي الصوص بحيث تغطي اللحمة وكبي معاها مويه لانه الصوص تقيله… حركي شويه عشان يندمج كل شي مع بعضه… وأول ما تجقجق، ارخي النار وخليها…

في المسافة دي اعملي الصوص البيضاء… طبعا الصوص الأحمر كل ما قعد، كل ما اتشربت اللحمة من نكهة صوص المكرونة وبقت طرية ولزيزه ومفكفكة…

الصوص الأبيض عبارة عن بشاميل طبعا… نكب كمية متساوية من الزبدة والدقيق في حلة في النار

نحرّكهم سوا كويس ومسافة ما نستعجل.. احنا عايزين طعم الدقيق يتغير وينطبخ.. عشان ما يكون طعمها دقيق… لما نقلِّب حيتفرتق الدقيق ويبقى لونه اصفر زي لون الزبده… اعملي حسابك ما يتحرق…

خلي في يدّك حليب بارد.. الكمية بتحدديها انت.. احنا للازانيا عايزين الصوص يكون خفيف… حأشرح السبب بعدين… كبي شوية من الحليب تقريبا زي نص كباية كده وزحي الحلة من النار وحرّكي بي مضرب البيض.. حتلقي الحليب اندمج مع الدقيق والزبدة.. بعد ده خلاص كده ما حتتكتل ليك… رجعي الحلة في النار وخليها مرخية… بعد الحليب يسخن حتتقل الصوص… زيدي حليب شويه للحله تاني لانه الكمية الكبيناها في الاول شويه… حنفضل نزيد كل شويه لحدي ما نصل لقوام خفيف للصوص…

نعمل ليها ملح وفلفل ولو عندك من الكريمة دي، كبي فيها… بتدي نكهة حللللللللوه للصوص وبتديها قوام ناعم ولزيز شديد.. لو ما عندك ما ضروري .. انا كان عندي باقي قلت اخلص منه

كده احنا جهزنا الصوص الأبيض والأحمر… نسيت ملاحظة مهمة عن الصوص الأحمر برضه اننا عايزينها تكون لينه.. ما تتسبّك.. يعني تكون فيها مويه زايده… يلا الهدف من انه الصوصين يكونوا لينات هو نوع اللازانيا إلانا مستعملاها… وعشان اختصر برنامج سلق اللازانيا وكده، بشتري النوع المابحتاج سلق… النوع ده بكون ارفع شويه، ومعمول بحيث انه يمتص من موية الصوص وينجض بيها بدل نتعذّب بي السلق

في حاجه اخيره محتاجين نجهّزها.. وهي جبنة البارميزان .. نجيب الجبنة الطازة ونبشر منها تقريبا كباية… ونجهز برضه كباية بتاعت جبنة موزريلا… انا حسيت الموزيريلا شويه قمت عمله معاها شيدر رغم انه اللازانيا الأصلية مافيها شيدر

نجي لتجميع اللازانيا… جيبي صحن يدخل الفرن… وأول طبقة اعمليها من الصوص الأحمر.. وخليك كريمة عشان ده هو الحينجّض اللازانيا حقتك.. الطبقة الفوق ليها طوالي رصّي شرايح اللازانيا حقتك…

من فوق للشرائح كبي من الصوص الأبيض وبرضه خليك كريمة.. اللازانيا لازم تغرق في الصوص عشان ما تطلع ليك ناشفه.. فوق الصوص الأبيض اعملي تلت كوب بارميزان وتلت كوب موزريلا وانا عامله شيدر زي ما قلت

الطبقة البعدها كرري نفس الخطوات.. صوص احمر، شرايح للازانيا، صوص ابيض تلت كوب من كل نوع جبنه.. كرري قدر ارتفاع الصحن بتاعك وآخر طبقة مفروض تكون الطبقة البيضاء ومن فوق ليها الأجبان عشان تعمل وش… غطّي صحنك بي فويل ودخليه الفرن، طبعا فرن ساخن.. بتحتاج اقل شي ٤٥ دقيقة وبعداك اكشفيها وشغلي الشواية عشان تاخد وش

بعداك طلعيها من الفرن وغطيها تاني عشان ما تنشف… واللازانيا ما بتتأكل طوالي.. اصبروا عليها اقل شي تلت ساعة.. لانها بتكون حارة شديد بتلسع الناس ما حيستمتعوا بيها… برضه الصوص بتاعك اعمليه كتيييييير.. اخير يفضّل ليك من انه يقصّر ليك وتلقي روحك مورّطة بي لازانيا ناشفة… ولو حصل ليك زيي، الكمية الفضلت عملت لي صحن تاني بتاع لازانيا… جهّزيه ودخليه الفريزر.. بتقعد تمام، لما تحبي تعمليها، من الفريزر للفرن طوالي.. وتطلع أحلى لازانيا