اكلة انجليزية ظريفة وشكلها لطيف تنفع في العزومات… ممكن تتعمل بنكهات كتيره في البطاطس…
هي عبارة عن لحمة مفرومة مع خضار من فوق ليها طبقة بتاعت بطاطس مهروسة … اول خطوة اننا نجهز اللحمة المفرومة… باي طريقة بتحبيها وأي خضار عايزاها… انا بحب اني ما اسبّكها، يعني يكون فيها شوية صوص عشان بعدين البطاطس تاخد من نكهة الصوص دي شوية
الخطوة التانية، نسلق البطاطس… ولو انتو زيي ما عندكم صبر.. قشّروا البطاطس وقطعوه قطع كبار واغمروه في موية وملح.. كده بتسلق سريع.. بعد يتسلق، نصفّي منه الموية
بعداك نهرس البطاطس… وهو حار نرمي فيه مكعبة صغيرة بتاعت زبدة… ونضوق الملح عشان نظبطه… نعمل ليها فلفل اسود وملعقة بتاعت حليب سائل ونكسر فيها بيضة… انا عملتها كده.. مرات بحب اديها نكهة بي التوم المشوي في الفرن، او بالجنبة الزرقاء لو انتو بتاكلوها.. ممكن بالأعشاب الجافة زي الاوريغانو والبيزيل..
بعداك نكب اللحمة المفرومة في صحن يكون بدخل الفرن… ما بحتاج نزّيتها لانها ما حتقعد في الفرن كتير وما حتمسك لانها لينه
بعداك نبدأ نرص البطاطس من فوق للحمة المفرومة على شكل أكوام.. دي الطريقة الوحيدة عشان البطاطس ما تزح اللحمة
بعداك بي شوكة براااااحة نفرد البطاطس فوق اللحمة ونعمل خطوط بالشوكة.. دي بتدي شكل مميز بعد تدخل الفرن
اخر شي نغطي الصينية وندخلها الفرن تتسبّك كلها مع بعض… لاحظوا كل الحاجات نجيضة.. ما عدا البيض.. بعد حوالي ربع ساعة، نكشف الصينية ونشغّل الشواية من فوق عشان تتحمّر… نقدمها مع سلطة وبتتاكل بي الملعقة ساي.. انا اخر شي رشيت من فوقها زيت زيتون عشان اللمعة ونكهته بنحبها في الاكل
بعد تقعد ترتاح شويه بتتماسك وممكن تطلعي منها قطعة مربعة حلوة زي المكرونة بالبشميل… لحقته ليكم القطعة دي قبل الشعب يكمّلها..
الصينية بي تحت بتكون نضيييييفة.. اللحمة المفرومة بتكون لاصقة في البطاطس
مطبخ مريم الحسين 
جربتها رهيبه طبعا تسلم يدك ♡
إعجابإعجاب
تسلم ايدك يا عسجد، هي فعلا لزيزه وأكله شتاء.. تنفعكم ان شاء الله
إعجابإعجاب