كاسيديا الفطور… اكله بتتعمل بي خبز التورتيا، لكن اعتقد انه ممكن بالخبز العربي برضه…
الطريقة.. لانه المقادير بتعتمد على حجم الطوة العندك… جيبي الطوة بتاعتك ويا ريت تكون ما بتلصق… وإلا حتتغلبي معاها… ختي فيها قطعة زبدة صغيرة للنكهة
تضربي تلاته بيضات معاهم ملح وفلفل… ويا الجماعة البتستخدموا الملعقة في ضرب البيض، الشوكة احسن وأسرع بكتيييييير… لو الطوة بتاعتك كبيرة زيدي البيض، لو شوية.. قلليه
بعد زبدتك ساحت، تكبي البيض عادي زي كل مرة… وتخلي النار مرخية.. غطّي الطوة، وخلي البيض يستوي من تحت ومن فوق يكون شويييييه سائل
بعداك كبي جبنة موزريلا او اي جبنة تكون بتسيح.. الهدف من الجبنة غير الطعم، انها تمسك التورتيا… لانه بعد الجبنة بنخت التورتيا بي فوق… انا بعمل الاكلة دي لما يكون عندي تورتيا ناشفة ما بتتلف سانوتشات.. البيض بخليها تبقى طرية ولزيزه… وممكن طوالي من الفريزر تعمليها لانه بتسخن بالبيض
كده الطوة فيها بيض، جبنة وشريحة واحدة بتاعت تورتيا… تقومي تجيبي صحن يكون نفس حجم الطوة وتختيه من فوق ليها عشان تقلبي الحاجات كلها في الصحن
كده بكون في الصحن عندك من فوق لتحت… البيض الجبنة والتورتيا اخر شي… تقومي براحة تزل في الطوة بنفس الترتيب ده… يعني لما يرجعوا الطوة حيكون ليك من فوق البيض
تقومي تاني تعملي جبنة ومن فوق ليها شريحة تانية تورتيا.. وتقفلي نارك وتغطيها عشان الجبنة تسح.. وتقطّعيها بي السكين او قطّاعة البيتزا
هنا عملتها بي تورتيا حمرا حجمها اصغر من الطوة عشان كده البيض ظاهر بالجنبات … بس ما بتأثر كتير..
هنا عملته واحده فيها طبقة بتاعت مارتديلا عشان بتي بتحبها.. رصيت المارتيديلا قبل البيض وباقي الخطوات نفس الشي… وطلعت احلى بكتير من السادة
يا حلوات، الوصفة دي جبتها من الزولة دي في الفيديو… قلت اوريكم ليها عشان طريقة القلبه بالفيديو اوضح من كلامي الكتير ده… في دقيقة كااااااملة من الكلام قبل تبدا تشتغل
مطبخ مريم الحسين 