طبعا الفئة المستهدفة هي العروسات والعزّابة…
طبعا العصيدة أصلا بتتعمل بي دقيق الذرة (نفس الدقيق بتاع الكسرة، زادنا مثلا).. وممكن بي خمّار او من غير خمّار.. حسب الناس عايزين شنو.. في كل الأحوال بتنجح.. الخمار ونوع الدقيق بأثّروا في طعم العصيدة وقوامها… وزي ما شرحت امس لنا مهدي، ممكن بي الدقيق حق القمح العادي البنعمل بيه الفطائر والكيك.. اول خطوة انا كبيت الخمّار، شوية لانه احنا ما بنحبها خميرة
بعداك كبيت دقيق الذرة (دقيق الكسرة)… المقدار كباية دقيق بتاخد كباية وربع موية لو عايزنها لينه، لو عايزنها جابره خلو لكل كباية دقيق كباية موية.. وطبعا انتو براكم بعد شويه حتكتشفو انتو بتحبوها كيف… العجين بكون اتقل من حق الكسرة.. بس نسوطهم كويس وكده احنا جاهزين
بعداك في حلّة تقيلة في النار (عشان ما تمسك ليك) كبي موية نص كمية العجين بتاعك… وخليها تغلي.. كبي ليها ملح تقريبا نص ملعقة صغيرة (لو حتعملي كوب دقيق، لو كمية الدقيق أكتر زيدي).. لما الموية تغلي، جهّزي مضرب البيض بتاع الشبك وكبي عجينك في الموية وسوطي بي مضرب الشبك بهدوء
نارك حسي بتكون متوسطة.. وانت يادابك كبيتي العجين البارد فحيكون برّد الموية.. فما تخافي ما حتتقل سريع.. سوطي كل شوية.. بعد فترة من السواطه حتلقي عجينك بقى تقيل.. لانه وانت بتحركي المضرب حتظهر خطوط في العجين (لاحظي الصورة)
لما تصلي المرحلة دي ارخي النار.. الغلط الأكثر شيوعا في العصيدة انه الواحده نستعجل وتقول كده خلاص استوت… لسه العصيدة عايزه زمن في النار… النار مرخية سوطي شوية وامشي ما تقيفي تحنسبها ما بتحتاج… لو تقلت ليك شديد كبي حبة موية ما تخافي… بعد حوالي خمسة دقايق، بلي اصبعك بي موية واهبشي العصيدة.. لو مسكت في اعصبك، معناها لسه نيّة خليها زيادة.. لو إصبعك طلع نضيف معناها انا جاهزه… جيبي كورتك العايزه تكبيها فيها واعملي فيها موية او سمنة.. بس حاجه عشان ما تمسك ليك وتتقلب بسهولة
ملاح العصيدة طبعا لازم يكون تقيل، لما تكبيه في العصيدة، يمسك فيها.. وصفة الملاح موجودة هنا… بس انا المره دي زدته الصلصة شوية…
مطبخ مريم الحسين 
السلام عليكم معاكي هاجر ام علي بس عاوزه اشكرك لانو بجد يديك العافيه انا متابعه ليكي بس عاوزه اعرف شنو الخمار
إعجابإعجاب
اهلًا بيك يا هاجر.. وشكرا على التعليق.. الخمّار هو جزء من العجين بنخليه عادة يخمر، يعني بكون فيه طعم حموضة كده.. بنضيف منه للعصيدة او الكسرة، عشان يديها شوية حموضة في الطعم.. كل الهدف منه هو الطعم.. يعني ممكن نستغني عنه لو ما بتحبو الطعم ده
إعجابإعجاب
السلام عليكم عزيزتي مريم حبيت اشكرك كتير على مطبخك الأكثر من رائع ومفيد والافادني انا شخصيا في موضوع الكسرة والايام دي قاعدة اجرب في العواسه ربنا يديك العافية ويحفظك انتي وعائلتك ودائما للأمام اختك أم عمر
إعجابإعجاب
الأخت ام عمر.. اتشرفت بيك شديد وشكرا على الكلام الجميل، ان شاء الله تظبط معاك الكسره وبيتك عامر
إعجابإعجاب