شوربة “الف سلامة”… شوربة دجاج مع الخضروات… تنفع لايام النزلات الحايمة دي وللوالدة جديد… ميزتها انها لزيزه ومفيدة جدا.. وسهلة… ممكن تتقدم مع الخبر المحمص في البيت
سافرته لي سفرية سريعة كده جيت بي إنفلونزا صعبة تعبتني تعب شديد.. طوالي اتذكرته الشوربة دي.. معروفة شوربة الدجاج انها بتساعد شديد لتلاته أسباب، والمامصدقني يسال شيخ قوقل… اول سبب انه شوربة الحارة والبخار بتساعد على فتح القنوات التنفسية، ثانيا بتزود الجسم بالسوائل ودي اهم حاجه اثناء نزلات البرد.. السبب التالت انه الأبحاث اثبتت انه شوربة الدجاج بالذات بتساعد على تخفيف الالتهابات المصاحبة للنزلة
طبعا للوالدة جديد، دي احسن من المديدة بكتير… مليانه خضار وفيها بروتين يرم العضم يا قول المصريين والسوائل بتساعد على إدرار الحليب.. وخفيفة على المعدة وصحّية .. غير شوربة الدجاج أضفت كم حاجه كده عشان تزيد الفايدة وتعزز العلاج… نتكلم عنهم حسي…
اول خطوة نكب شوية زيت في حلة في النار ونكب فيها الدجاج مغسّل.. ممكن اي جزء من الدجاجة بس ضروري يكون يكون فيها عضم… عشان العضم هو البطلّع الشوربة سمحة… الهدف من التقليب في الزيت انه دخلي الدجاج يكون طبقة عشان ما يبقى تفل بالقعاد الكتير في الموية.. ارمي معاه بصلات صغار وأربعة فصوص توم جرّحيه عشان يطلع نكهته
بعد شويه اغمريهم بي موية عشان ندي الدجاج فرصة يبدأ سوا قبل ما نضيف باقي الخضار.. اعملي ليه ملعقة كزبرة مسحونة عشان الزفارة.. وغطيه على نار هادئة… في المسافة دي جهّزي البهارات
الشوربة بتدور البهارات … ويا ريت تكون صاحية لكن طبعا البهارات سغيلة لو اتقرشت… لو عندك شاش ممكن تستخدميه…ولو لقيتي زي الكيس ده، تقدري تستخدميه … بعد ننتهي منه بنمرقه نجدعه ولا تقرش هبهان ولا قرفة! اها ختي فيه هبهان وأعواد قرفة وفلفل اسود صاحي وكزبرة صاحية .. ويا ريت كل واحد تديه دقه خفيفة قبل تدخليه الكيس.. اقفلي الكيس وارميه مع الدجاج والمويه
يلا في المسافة دي غطّي الحلة عشان تجهّزي خضارك.. خلي النار هادية عشان البهار تنزل وتنكّه الشوربة
اهم حاجه حنعملها عشان الشورية تزيد فايدتها هي اننا حنضيف جنزبيل فريش… الجنزبيل معروف فيه مضادات أكسده بتزيد من المناعة، ده غيره نكهته اللزيزه… لو ما عندك ممكن تستخدمي جنزبيل بودره بس خليك حذره.. البودره نكهته قويه وممكن يشطشط ليك.. اعملي نص ملعقة صغيرة كافية.. لو عندك الفريش قطّعيه بالشكل ده، وكبيه طوالي لانه بياخد زمن عشان ينجض..
زيدي الموية لو حسيتيها نقصت، لازم تكون غامره الدجاج.. وقطعي باقي الخضار بتاعتك.. انا عامله جزر (فيتامين سي)، بطاطس (نكهة وطعم وقوام)، فلفل اخضر (كمية خرافية من فيتامين سي)، وكوسة (عندي وبترفع القيمة الغذائية)..
كبي ملح مبدئيا، لقدام حتحتاجي تزيديه… أبدي بالخضار القوي، الجزر في حالتي.. عشان محتاج وقت أطول يستوي.. بعدها بشويه البطاطس… بعدها بشوية الفلفل الاخضر اخر شي الكوسة… لاحظو انه انا مقطعاهم صغار.. ده بخلي الخضار يستوي أسرع.. لكن برضه ممكن يتهرد.. طبعا ممكن تهرديه لو ناسك عندهم مشكلة مع الخضار الصاحية
بعد نضيف كل الخضار وتبدا تغلي الشوربة، نطلع كيس البهارات… ونرميه…
انا بحب أضيف بهار مسحون.. عمله هبهان وقرفة مسحونه
كده تقريبا الشورية جاهزه.. اديها ملعقة بتاعت دكوة.. حسب كمية الشوربة بتاعتك.. انا عملته ملعقة كبيرة .. الدكوة بتدي نكهة حلوة جدا… وبتخلي الشوربة قوامها كريمي كده.. وبتخفف من حدة طعم الخضار ويخليها لزيزه
بعداك نضيف حوالي كباية من الشعيرية.. ايوه والله شعيريتنا العادية دي البنعملها بالسكر، تخلي طعم الشوربة خيال… لو ما عندك ممكن تستخدمي مكرونه.. في نوع مكرونة زي الشعيرية.. زي الصورة دي… او مكرونه عادية.. بس بتكون لزيزه لو حجمها اصغر.. لانه كمية الشعيرية ما كتيرة ما بتحتاج تغلي، كبيها وغطي الحلة بتستوي بباقي الحرارة
كبي الشوربة في الكورة، ورشي من فوق ليها شطّة مجروشة.. الشطة برضه عندها فوايد كبيرة للجسم وبتعزز المناعة. وختي جنبها نص ليمونه… وألف سلامة
اعملي ليك قرض… بقتل الفيروسات في البيت.. ولو ما عندك، بت خالي قالت لي ممكن نستخدم بخور حبة البركة… مع ضرورة تهوية البيت يومي… عشان الفيروسات تطلع من البيت
مطبخ مريم الحسين 