البيرجر المنزلي

البيرجر المنزلي بطريقة زميلتنا الحبيبة سامية… تسلم ايدها بالجد طلع رهيب… انا عملته تغير بسييييييط في البهارات .. لكن باقي الحاجات نفس طريقتها

حسب طريقة أختنا سامية، المقادير… كيلو لحمة مفرومة معاهم نص بصلة صغيرة وملعقة كبيرة كاتشاب وملعقة كبيرة مسطرد.. معاهم ملعقة كبيرة بصلة مجفف بودره وزيها توم بودرة… ملح وفلفل وبيضة…وبابريكا تقريبا ملعقة كبيرة

اول حاجه ختيت اللحمة المفرومة والبصلة الصاحية في مفرمة صغيرة الشوام بسمّوها الكبّة.. زي الصورة دي.. نعّمته بيها اللحمة وبالمرة اتفرمت البصلة

بعداك أضفت باقي المكونات وحرّكتها بملعقة خشب اول ما اندمجوا وقّفته… البيرجر بقولوا ليك ما تحركيه كتير ببقى قوي.. الشي التاني، البيرجر الأصلي أهله بعملوا ليه ملح وفلفل بس… البهارات ممكن تبقّي طعمه زي الكفتة…اعتقد برضه البهار الفي الكتشاب والمسطرد حلوين مع نكهة التوم والبصل..

نجي للتشكيل.. ما عندي شي اشكّّل بيه.. قمت لقيت الفكرة دي اثناء ما بفتّش في الموضوع… نجيب باغة او كوره بالحجم العايزينه… ونخت من فوق ليها قطعة من كيس.. انا عشان لايوقه، وزنته كل بيرجرايه عشان يطلعوا لي نفس الحجم.. كل واحده خليتها حوالي ١٥٠ جرام

من الحاجات القريتها وعجبتني انه وانت بتشكّلي البيرجر، اديه عفصه في النص بالإصبع عشان لما تختيه في النار حيحافظ على شكله الدائري

بعداك كل قطعة ختيتها فوق للتانية وبيناتهم كيس عشان ما يتلصّقوا…ودخّلتهم التلاجة.. مفروض البيرجر يقعد في التلاجة قبل يتنجّض اقل شي تلاته ساعات.. انا عملاه من امس الصباح ونجّضته الليلة لاولادي غديتهم بيه

نجي للتسوية، انا شويتهم بي شواية البوتوجاز… لكن طبعا انتو ممكن تستخدموا اي طريقة عايزنها…

نختها في النار ونخليها تسسسسسسسخن… ونمسحها بي زيت او نرشها بي البخاخ… ما نغرّقها زيت لأننا عايزين نشوي ما نحمّر.. بعد تسخن نرص البيرجر بس ما نزحمها… عشان الشواية ما تبرد

برضه البيرجر ما بدور التحريك.. بس نخته نخليه مسااااافة يستوي ونقلبه قلبه واحده بس.. ما ينفع تقعدي تقلّبيه كتير… بعد تشعري بيه نجض من تحت اقلبيه

بعداك زحيه لجهة بعيده عن النار في شوايتك زاتها ما تطلعيه… وختي من فوق ليه قطعة جبنة.. وخليه مسافة لمن الجبنة تسيح

بعد تسيح الجبنة طلعيه وكده انت جاهزه تحشيه.. انا بعمل صوص لزيزه عشان اولادي ما بحبوا البصل الصاحي دواير كبيرة… بقوم أقطعه صغاااار، وعشان ما يقع من الساندوتش بعمل معاه ملعقتين مايونيز وملعقة مسطرد

العيش بتاعك اديه تحميصه بسيطة في الشواية… دي بتعمل فرق خرافي في الطعم

لو عندك خس وطماطم ومخلل جهّزيهم.. انا ما كان عندي.. وامسحي العيشة التحت بالصوص

من فوق ليها قطعة البيرجر والجبنة السايحة

بعدها الطماطم فوق للجبنة واعملي كاتشاب في العيشة التانية … وينفعععععععكم

ملاحظات عامة لكن مهمة:
١- اللحمة لازم يكون فيها نسبة من الدهن، النسبة بقولوا تكون تقريبا ٢٠٪.. من غيرها ببقى ليك متفّل وناشف..
٢- احنا لحمتنا المفرومة بنلخبط عجالي مع ضان.. لكن بطلع أطعم بكتيييييييير بالضان براه
٣- اعملي حجم البيرجر بتاعك اكبر من العيش، لانه بصغر في النار.. عشان يطلع ليك قدر العيشة كبّريه شوية…