الشيش طاووق مع التومة

الشيش طاووق مع التومة… نزلتها مره زماااااااان، امس فاتّشتها عشان انقلها للblog ما لقيتها خالص… واصلا كنت ناوية اعملها ليهم طوّلوا منها..

اوووووول حاجه بنستخدم الارجل المخلية… دي احسن جزء من الدجاج وبستحمل النار ما بنشف.. ممكن تجازفوا وتعملوا الصدر…. لكن اعملوا حسابكم ما يقعد كتير في النار ينشف

اها بعداك تقطعي الأفخاذ تقريبا كل واحد لأربعة… ما تقطعيه صغار… نجي بعداك للتتبيلة.. اعملي زبادي بس على قدر ما يغطي كل الدجاج ما تكتّري… اعملي تلاته فصوص توم وملعقتين كبار طحينة وملعقة صغيرة شمار ناشف.. ملح وفلفل ونص ليمونه ومعاهم ملعقة كبيرة صلصة… لو عندك فرقة، خلي الدجاج في التتبيلة لو ما عندك ما ضروري… كده بكون بقى تمام

يلا بعداك جهّزي خضارك العايزه تعمليه.. انا شبابي ما بحبو الطماطم.. وما بحبو الفلفل الملوّن.. اها بس الخضار البنعمله البصل والفلفل الاخضر.. قطعيه لقطع اكبر من حجم الدجاج لانه اثناء التنجيض بصغر شديد

كده انت جاهزه تعملي الشيش بتاعك… ممكن تستخدمي بتاع الحديد.. وممكن تجيبي بتاع الخشب… انا بعمل بتاع الخشب لانه حجمه صغير وبحب كل زول يشيل سيخته.. انا نجضتهم بي تيفال .. القلاية المن غير زيت.. لو ما عندك ما ضروري.. بس انا حبيت أتكلم عنها عشان في اخوات سألوني عن وصفات بيها… برص الشيش بي فوق وفي نفس الوقت بقطع بطاطس شبس يكون بنجض في الرف التحت

ممكن خالص تستخدمي الفرن بتاعك، تحديدا الشواية الفوق من الفرن.. او لو عندك شواية بتاعت بتوتجاز ممكن تستعمليها.. انا قبل اجيب التيفال كنت بعملها بالشوّاية..

اثناء ما الشيش بستوي.. نعمل التومة.. دي وصفة زميلتنا سناء خالد وقبل كده نزّلتها… في الخلاط بتاعك ختي بياض بيضة واحده وأعصري نص ليمونتك الباقي داك وكبي حوالي ربع ملعقة صغيرة ملح وفلفل اسود وفص واحد توم وشغلي الخلاط… بعد مسافة حتلقي التوم اندمج مع باقي الحاجات وعمل رغوة.. لو خلاطك عنده فتحه صغيرة افتحيها وكبي زيت نباتي عادي..

كبي الزيت خيط رفييييع وراقبيها.. حتلقي شويه شويه بقت تومه تقيله زي حقت المحلات… وقفي الزيت وختيها في صحن.. دبّلي الكمية لو عدد الناس كتير

الشيش ما بطّول في النار لانه قطع صغيرة والزبادي بهشش الدجاج.. وقت التسوية بعتمد على الطريقة المستخدماها.. لو بالشوّاية أسرع من الفرن.. عشان تعرفيه نضج ولا لأ.. بي ملعقة اضغطيه بتلقيه بتفرتق.. كده معناها استوى