الكريب بالتونه.. اكله غياظة وشغلها كتير وبتكمل بسرعة.. مهما تتعمل كتيره، بتختفي سريع من الصحن..
امس طلعنا اتغدينا برّه تغيير.. قمت قلت فرصة اعملها ليهم لانه شغلها كتير.. وهم بحبوها شديد.. فعملته الكريب امس وخلصته وختيته في التلاجة، الليلة عملته الحشوة وحشيتها ودخلتها الفرن… اول حاجه عجينة الكريب.. في وصفات كتييييييره.. لكن انا بعمل كوباية دقيق مع كوباية ونص حليب وبيضة ورشة ملح… ولو بتتضايقوا من ريحة البيض، اعملوا نقطتين تلاته خل.. ممكن تختوا الحاجات دي كلها في الخلاط بس ما تخلطوا كتير… وممكن بي مضرب البيض اليدوي.. انا بحب أحرك الدقيق بي المضرب شويه عشان يكون حبّاته مفرّقه
نجمع المكونات كلها، العجينة بتكون رقيقة شديد وسائله.. ده بخلي عمل الكريب ساهل.. طبعا الكريب هو زي اكله فرنسية بعملوها بي حاجات كتيره، ممكن حلو وممكن مالح.. هنا في محل كامل اسمه كريب، عنده حاجات حلوه شديد معاه.. الطريقة، تجيبي الطوة وتجيبي مقياس ربع كباية، ما ضروري المقياس لكن عشان يطلعوا ليك متساوين.. نخت الطوة في النار ونخليها على نار متوسطة.. لو عندك طوة تيفال يكون تمام، ما بتحتاج لزيت.. لو ما عندك امسحي الطوه بي زيت في منديل.. ارفعي الطوة بي يدك الشمال وكبي العجين.. وحركي الطوة عشان العجين يغطيها الطوة كلها..
الكريب بطلع رهيييييف… وكل ما طلع رهيف كل ما كان احسن… ما تهتموا لي شكله ما بظهر بعدين…. انا امس كنت تعبانه وما عندي حيل اظبّط شكله، عادة بستخدم طوة صغيرونة.. بس لانه الكمية العملتها قدر تلاته مرات (يعني ضربت المقادير في تلاته)، حسيت اني حاقيف كتير.. ختيت الكريب بعد برد شويه في صحن وغطيته بي كيس ودخّلته التلاجة..
الحشوة عملتها بالتونه طبعا، الاكلة دي امّي زمان كانت بتعملها بس بتحشيها لحمة مفرومة، لكن يوم عايزه اعملها وبعد جهّزته الكريب اتورطّته وما لقيت عندي لحمة.. قمت اخترعته برنامج التونه دي ومشت مع شبابي أكتر من اللحمة… نجيب علبة تونة بالزيت، نكب زيت التونه في حلة في النار ونكب فيها بصلتين صغار مقطعات مكعبات صغيرة ونقلبهم في الزيت… بعد يذبل البصل نزحه بالجنبه، ونكب لينا ملعقة بتاعت صلصة… الحركة دي بتدي طعم حلو.. نقلب الصلصة في الزيت وبعداك ندمجها مع البصل..
نكب ليهم فصين توم مهروسات ونكب التونة وملح وفلفل ونقلّب شويه.. بعداك نكب نص ملعقة صغيرة خل.. الخل ضروري وبعمل فرق بالجد… نقطع فلفلة خضرا صغار ونكبها معاهم ونقلبهم شويه.. كده جاهزين للحشو.. كبي حشوتك في صحن واوووووعك تغسلي الحلة.. بنجيها راجعين
نبدأ نحشي الكريب على شكل أصابع… ما ضروري تنتظري الحشوة تبرد، بس على ما تتحملها أصابعك.. نكب الحشوة في طرف الكريب، ونلفها أصابع… امللللي الصينية وحشّري بالجنبات لانه الناس دي حتقوم بيها كلها
يلا نجي للصوص الفوق.. في حلّتك ديك كبي زيت تاني وعليه ملعقتين صلصة وتلاته فصوص توم.. خليهم كلهم مع بعض في النار لأننا ما عايزين التوم يتحمّر.. الصلصة حتمنعه يتحمّر.. بعد شويه كبي ملعقة صغيرة خل، وملح وفلفل ونص كباية موية.. حتلاحظي الصلصة اندمجت مع بعضها وبقت صوص متجانس.. خليه شويه كده يغلي وكبيه فوق الكريب…
اعملي رشة بسيطة بتاعت وموزيرلا… بس شكل ما ضروري لو ما عندك، بس بتدي شكل لطيف… غطي الصحن بي فويل ودخليها الفرن حوالي تلت ساعة… وخليها مغطية، انا بحب لون الجبنة يفضل ابيض..
بعد تجهز لو الكريب عاملاه صغار ممكن تتقسم كل كم كريبه لزول.. ولو طوال زي العاملاه انا، ممكن تقطعيه بالسكينة مربعات زي الصينية العادية.. اكله كامله ما عايزه لا عيش ولا اي شي…
مطبخ مريم الحسين 
تسلم يدك
إعجابإعجاب
ماشاء الله تسلم إيدك
إعجابإعجاب
جربت نفس الخطوات لكن باللحمه المفرومه بدل التونه وطلعت راااائعه جدا
إعجابإعجاب