كيكة القمع، او الfunnel cake ناس أمريكا وضواحيها بعرفوها… واعتقد بتشبه حاجه زمان حبوباتنا كانوا بعملوها في الاعراس اسمها المدوَّر… مهما كان اسمها، لزييييزه في البرد ده ومشبعه… مع الشاي او عشا خفيف… الوصفة شفتها عند قريبتي هنا جات من أمريكا وعملتها لينا.. واتشبّكته فيها من يومها
المقادير بتكفي تعمل ليك ثمانية واحدات، بتحتاجي لي بيضتين وكوباية حليب وكوباية موية.. ديل اخفقيهم سوا بي مضرب الشبك ساي او لو مكسّله زيي كده، بمضرب الكهرباء…
ضيفي ليهم ملعقة كبيرة باكينج باودر ونص ملعقة صغيرة ملح وفانيليا وتلاته كبابي دقيق.. القوام بكون سائل.. لو نوع الدقيق العندك تقيل ممكن تزيدي حليب زيادة المهم انه العجينة تكون سائل تتكب ليك
كده انت جاهزه… في حلّة متوسطة (حسب حجم الكيكة العايزاها) سخّني زيت لحرارة متوسطة … العجين في أمريكا بكبوه بي قمع… عشان كده اسمها كيكة القمع.. لكن لو عندك كوب عنده بوز صغيّر بتحصلي على نفس النتيجة… وأسهل من الشغل بالقمع.. انا القمع العندي راسه صغير شديد، بحبس العجين وما بنزل سريع.. استخدمته الكوب المعياري بتاعي عنده بوز صغير.. حانزل ليكم فيديو في بوست منفصل عشان تشوفوا الحركة كيف
اول ما تكبوا العجين حيقوم يطفح بي فوق الزيت ويبدا يتحمّر.. انتظريه لحدي ما تبقى حوافه حمرا.. واقلبيه.. لو عندك المسّاكه دي، القلبه بتكون ليك ساهله شديد… بعد تتحمّر من الجهة التانية طلعيه في ورق زيت وكبي ليه سكّر بودره
ده فيديو بشرح طريقة رمي الكيكة في الزيت عشان تكون واضحة ليكم
مطبخ مريم الحسين 