ملاح التقلية والتعيمية بطريقتي
عملتهم الاتنين الليلة.. احترت.. الاولاد قالوا عايزين نعيمية وأبوهم قال طوّلنا من التقلية.. قلت خلاص اعمل الاتنين.. اول شي المكونات المبدئية للملاحين نفس الشي مافي فرق… لكن بعدين بتكون الاختلافات في النهاية.. انا عشان عايزه اعمل ملاحين الكمية كبيرة… عامله بصلتين كبار ومعاهم أربعة ملاعق بصله منشّفه رسلتها لي امّي.. ما ضروري البصلة المنشفة لكن انا بحب نكهتها.. بس من غيرها الملاح بكون برضه تمام… محتاجين لي طماطم انا بستخدم حقت قودي مقشرة ومقطعة، لكن لو عندك طماطم حمرا في البيت ممكن.. بنحتاج لي لحمة مفرومة وكزبرة ناشفة وقرفة مسحونه وبابريكا (ما ضروري بوريكم البديل بعدين) وتوم بودره برضه ما ضروري… وملح وفلفل اسود..
اول خطوة نقطع البصل، وما تتعبوا روحكم معاه شديد.. شرايح ونخت الحلة في النار وفيها زيت.. في ناس بحبوا الزيت يكون غزير.. بس احنا بنحاول نخفف شويه…نقلِّب البصل تمام في الزيت وبعداك نخليه مسافه عشان يتحمر… ما تخلي شغلتك وتقابليه وتقعدي تسوطي، خليه شويه عشان يتحمر ليك.. نكهة التقلية الاسااااااااسية هي البصلة المحمّرة..
نسوان الإمارات عندهم الحاجه السمحة دي.. امّي كل مره بتجيب لي كرتونه، والله بتختصر كتيييييييير…
بعد البصلة تتحمّر، اعملوا حسابكم ما تتحرق نخت معاها اللحمة.. يلا انا جماعتي ما بحبوا اللحمة المفرومة الكتيرة او ظاهره.. دايرين الملاح يكون زي معمول بي اللحمة المجففة.. بقوم في طوة بقلّب اللحمة لحدي ما تنشف، بعداك أكبها مع البصلة… او ممكن تنشّفوها بي المايكروويف..اول ما اللحمة تدخل بنكب الكزبرة طوالي.. عشان الكزبرة مهمتها تشيل زفارة اللحمة… ونقلّب اللحمة في البصلة شوية عشان تاخد من نكهتها… عايزه اوريكم ملاحظة، انا مع البصلة دي مستخدمة البصلة الناشفه قلّبتها في الزيت عشان تتحمّر.. لو ما كده كان خليت بصلي الأبيض ده يتحمر أكتر من كده
بعداك نكب الطماطم المقطعة ونكب ليها ملح وموية.. مسافة ما تجقجق، نوطّي النار ونمشي .. نخلي الطماطم تغلي لما روحها تمرق.. منها البصلة واللحمة تستوي ومنها حموضة الطماطم تروح… حتلاحظوا انه ريحة الطماطم زاتها ظاهره.. بعد تستوي تمام ريحة البصلة هي البتطغى.. لو الموية بقت قليلة شديد وظهرت طبقة زيت ولسه ريحة الطماطم ظاهره زيدوا الموية
بعداك نجيب الخلاط اليدوي… نخلط البصل واللحمة والطماطم وكل حاجه مع بعض…خلطة جامده ما تخلوا شي ظاهر..
بعداك نجيب كباية موية ونشيل بقايا الملاح الفي الخلاط بي الموية.. دي اتعلمتها من امّي… بدل نغسل يد الخلاط ساي.. واصلا احنا محتاجين نكب مويه
كده الأساس بتاعنا بقى جاهز للملاحين.. لو عايزين ممكن تجهزوا كمية زي دي وتدخل التلاجة.. متى ما احتجنا نعمل ملاح ناخد..بعداك انا قسمته الكمية لي تلت/تلتين… التلت للنعيمية والتلتين للتقلية.. التقلية أديتها زيارة موية وفلفل اسود، كتّروا حلو الفلفل الأسود في التقلية.. وزيدوا الملح..
بعد يغلي نكب ليه شمار ناشف ونلايقه بي ويكة.. اها الويكة حسب، لو الملاح حيتأكل بي قراصة او عصيدة خلوا الملاح تقيل .. لو ملاح كسره خففوه شويه.. ما تخلوا الملاح يغلي كتير بعد الويكة، بتقطع..
كبَّوا خيط بتاع زيت سمسم، بخليه فنااااان.. الحركة دي أخدتها من عمّة اولادي … بالجد بطلع طعمه مميز.. احنا ابونا ما بحب الصلصة كتير، كان ممكن اعمل ليه.. لكن لو حابين، قبل الويكة، في طوه كبي زيت وصلصه وخليها لونها يبقى غامق وكبيها في الملاح قبل تلايقه
التلت بتاع النعيمة طبعا اقل من حق التقليه لانه النعيمية لسه جايها الزبادي، بزيد الكمية.. ونكهة النعيمية من الدكوة والزبادي وخفيف من البصله المحمره… الزبادي كبيه في كوره معاه ملعقتين دقيق عادي وسوطيه بي مضرب البيض لحدي ما يبقى ناعم .. الهدف من الحركة دي الهدف منها انه الزبادي ما يبقى عامل نقط نقط في الملاح بعدين.. ممكن نستخدم روب بدل الزبادي لكن نزيد كمية الدقيق…
نعمل في خلطتنا ديك فلفل اسود وملعقة دكوه، انا بستخدم دكوة السوق، بالنار ساي بتذوب، لو عايزين تستخدموا حقت السودان ذوّبوها مع الزبادي لانها ما بتذوب بي هينة…
بعداك نكب خليط الزبادي والدقيق ونرخي النار ونحرّك.. النار لو عالية الزبادي بقطع وبتبقى في مويه كده بالأطراف… نحرك لحدي ما الدقيق ينجض، بنعرفه بي انه الملاح ببقى تقيل كده.. زيدوا الملح واتاكدوا انه مزبوط
اولادي بحبوا نكهة الويكة مع النعيمية، بس خفيييييفه..
اهم شي انه بعد ملاحاتك دي تنتهي.. ما تغطيها تماماً وهي حاره… بتقوم تقطع ليك
مطبخ مريم الحسين 
ومنكم نستفيـــــــــــــــــــــــــــد …
إعجابLiked by 1 person
التنبيهات: العصيدة | مطبخ مريم الحسين·
ماشاء الله عليك طباخة ماااهرة
إعجابLiked by 1 person
رهيب ماشاء الله تسلم يدك
إعجابLiked by 1 person
فنانة يا مريم 🙂 الزبادي بتاع ملاح الروب كميتو شنو ؟
إعجابLiked by 1 person
شكرًا يا نجلاء… الزبادي طبعا بعتمد على كمية الملاح بتاعك.. ابدأي بكباية واحده.. وبعداك قرري حسب اللون والطعم.. يعني ضوقي ملاحك بعد تضيفي الزبادي.. لو شعرتي محتاج زيادة بتقدري تزيدي..
إعجابإعجاب
مجهود جبار منك .. ربنا يجزيك الخير ، عزابة وبنتعلم منكم و شرحك وافي . مشكورة
إعجابإعجاب
الأخ احمد
شكرا على التعليق والتشجيع
ربنا يرد غربتنا جميعا.. وان شاء الله بحاول انزّل المزيد في رمضان.. بالهنا والعافية .. دعواتكم
إعجابإعجاب
السلام عليكم طريقة ساهلة ومكونات متوفرة طيب انا بخاف اضيف الشمار في الطبيخ بحس نكهتو ماحلوة انتي رايك شنو
إعجابإعجاب
فعلا محتاج حرص الشمار.. لكن مع التقلية لو قللتي الصلصة وعملتي شمار، بطلع فنان.. مع النعيمية نهائي ما بستطعمه
إعجابإعجاب
تسلم أيديك يا مريم ربنا يبارك فيك وفي عياالك
إعجابإعجاب
تتبارك ايامك يا ام الصديق، شكرا ليك على ذوقك
إعجابإعجاب
تسلم يدك
إعجابإعجاب
وايديك يا سحر.. هنيئا
إعجابإعجاب
تسلم يدك شرح جذاب ووافي
إعجابإعجاب