ملاح التقلية والنعيمية

ملاح التقلية والتعيمية بطريقتي

mola7T&N_final

image1

عملتهم الاتنين الليلة.. احترت.. الاولاد قالوا عايزين نعيمية وأبوهم قال طوّلنا من التقلية.. قلت خلاص اعمل الاتنين.. اول شي المكونات المبدئية للملاحين نفس الشي مافي فرق… لكن بعدين بتكون الاختلافات في النهاية.. انا عشان عايزه اعمل ملاحين الكمية كبيرة… عامله بصلتين كبار ومعاهم أربعة ملاعق بصله منشّفه رسلتها لي امّي.. ما ضروري البصلة المنشفة لكن انا بحب نكهتها.. بس من غيرها الملاح بكون برضه تمام… محتاجين لي طماطم انا بستخدم حقت قودي مقشرة ومقطعة، لكن لو عندك طماطم حمرا في البيت ممكن.. بنحتاج لي لحمة مفرومة وكزبرة ناشفة وقرفة مسحونه وبابريكا (ما ضروري بوريكم البديل بعدين) وتوم بودره برضه ما ضروري… وملح وفلفل اسود..

اول خطوة نقطع البصل، وما تتعبوا روحكم معاه شديد.. شرايح ونخت الحلة في النار وفيها زيت.. في ناس بحبوا الزيت يكون غزير.. بس احنا بنحاول نخفف شويه…نقلِّب البصل تمام في الزيت وبعداك نخليه مسافه عشان يتحمر… ما تخلي شغلتك وتقابليه وتقعدي تسوطي، خليه شويه عشان يتحمر ليك.. نكهة التقلية الاسااااااااسية هي البصلة المحمّرة..
image6
نسوان الإمارات عندهم الحاجه السمحة دي.. امّي كل مره بتجيب لي كرتونه، والله بتختصر كتيييييييير…
image7
بعد البصلة تتحمّر، اعملوا حسابكم ما تتحرق نخت معاها اللحمة.. يلا انا جماعتي ما بحبوا اللحمة المفرومة الكتيرة او ظاهره.. دايرين الملاح يكون زي معمول بي اللحمة المجففة.. بقوم في طوة بقلّب اللحمة لحدي ما تنشف، بعداك أكبها مع البصلة… او ممكن تنشّفوها بي المايكروويف..اول ما اللحمة تدخل بنكب الكزبرة طوالي.. عشان الكزبرة مهمتها تشيل زفارة اللحمة… ونقلّب اللحمة في البصلة شوية عشان تاخد من نكهتها… عايزه اوريكم ملاحظة، انا مع البصلة دي مستخدمة البصلة الناشفه قلّبتها في الزيت عشان تتحمّر.. لو ما كده كان خليت بصلي الأبيض ده يتحمر أكتر من كده
بعداك نكب الطماطم المقطعة ونكب ليها ملح وموية.. مسافة ما تجقجق، نوطّي النار ونمشي .. نخلي الطماطم تغلي لما روحها تمرق.. منها البصلة واللحمة تستوي ومنها حموضة الطماطم تروح… حتلاحظوا انه ريحة الطماطم زاتها ظاهره.. بعد تستوي تمام ريحة البصلة هي البتطغى.. لو الموية بقت قليلة شديد وظهرت طبقة زيت ولسه ريحة الطماطم ظاهره زيدوا الموية
بعداك نجيب الخلاط اليدوي… نخلط البصل واللحمة والطماطم وكل حاجه مع بعض…خلطة جامده ما تخلوا شي ظاهر..
image5
بعداك نجيب كباية موية ونشيل بقايا الملاح الفي الخلاط بي الموية.. دي اتعلمتها من امّي… بدل نغسل يد الخلاط ساي.. واصلا احنا محتاجين نكب مويه
image8

كده الأساس بتاعنا بقى جاهز للملاحين.. لو عايزين ممكن تجهزوا كمية زي دي وتدخل التلاجة.. متى ما احتجنا نعمل ملاح ناخد..بعداك انا قسمته الكمية لي تلت/تلتين… التلت للنعيمية والتلتين للتقلية.. التقلية أديتها زيارة موية وفلفل اسود، كتّروا حلو الفلفل الأسود في التقلية.. وزيدوا الملح..

بعد يغلي نكب ليه شمار ناشف ونلايقه بي ويكة.. اها الويكة حسب، لو الملاح حيتأكل بي قراصة او عصيدة خلوا الملاح تقيل .. لو ملاح كسره خففوه شويه.. ما تخلوا الملاح يغلي كتير بعد الويكة، بتقطع..

كبَّوا خيط بتاع زيت سمسم، بخليه فنااااان.. الحركة دي أخدتها من عمّة اولادي … بالجد بطلع طعمه مميز.. احنا ابونا ما بحب الصلصة كتير، كان ممكن اعمل ليه.. لكن لو حابين، قبل الويكة، في طوه كبي زيت وصلصه وخليها لونها يبقى غامق وكبيها في الملاح قبل تلايقه
التلت بتاع النعيمة طبعا اقل من حق التقليه لانه النعيمية لسه جايها الزبادي، بزيد الكمية.. ونكهة النعيمية من الدكوة والزبادي وخفيف من البصله المحمره… الزبادي كبيه في كوره معاه ملعقتين دقيق عادي وسوطيه بي مضرب البيض لحدي ما يبقى ناعم .. الهدف من الحركة دي الهدف منها انه الزبادي ما يبقى عامل نقط نقط في الملاح بعدين.. ممكن نستخدم روب بدل الزبادي لكن نزيد كمية الدقيق…
نعمل في خلطتنا ديك فلفل اسود وملعقة دكوه، انا بستخدم دكوة السوق، بالنار ساي بتذوب، لو عايزين تستخدموا حقت السودان ذوّبوها مع الزبادي لانها ما بتذوب بي هينة…

image4

بعداك نكب خليط الزبادي والدقيق ونرخي النار ونحرّك.. النار لو عالية الزبادي بقطع وبتبقى في مويه كده بالأطراف… نحرك لحدي ما الدقيق ينجض، بنعرفه بي انه الملاح ببقى تقيل كده.. زيدوا الملح واتاكدوا انه مزبوط
image3
اولادي بحبوا نكهة الويكة مع النعيمية، بس خفيييييفه..
image2
اهم شي انه بعد ملاحاتك دي تنتهي.. ما تغطيها تماماً وهي حاره… بتقوم تقطع ليك
image1
طبعا ممكن نعمل الخطوات كلها، وفي النهاية نعمل ملاح واحد فيهم بس…

15 responses to “ملاح التقلية والنعيمية

  1. التنبيهات: العصيدة | مطبخ مريم الحسين·

    • شكرًا يا نجلاء… الزبادي طبعا بعتمد على كمية الملاح بتاعك.. ابدأي بكباية واحده.. وبعداك قرري حسب اللون والطعم.. يعني ضوقي ملاحك بعد تضيفي الزبادي.. لو شعرتي محتاج زيادة بتقدري تزيدي..

      إعجاب

    • الأخ احمد
      شكرا على التعليق والتشجيع
      ربنا يرد غربتنا جميعا.. وان شاء الله بحاول انزّل المزيد في رمضان.. بالهنا والعافية .. دعواتكم

      إعجاب

  2. السلام عليكم طريقة ساهلة ومكونات متوفرة طيب انا بخاف اضيف الشمار في الطبيخ بحس نكهتو ماحلوة انتي رايك شنو

    إعجاب

    • فعلا محتاج حرص الشمار.. لكن مع التقلية لو قللتي الصلصة وعملتي شمار، بطلع فنان.. مع النعيمية نهائي ما بستطعمه

      إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s