طبيخ البامية

كيف تسبّكي الطبيخ… حأشرح بمثال عن طبيخ البامية.. البوست اهداء لدعاة السودنة ولكل عروسه جديده ؛)

bamya_final

اكعب حاجه ممكن تحصل لما تكبي طبيخك في الصحن، وتسيل مويه شفافه كده بالجنبه… معناها طبختك ما مسبّك.. لما الموية تسيل بي الجنبة، معناها المويه الفي الطبيخ لسه ما طلعت.. او بصلتك ما اتحمّرت كويس..

اول خطوة: تحشي بصلك، ممكن زييّ شرايح وممكن مكعبات صغار… كبي زيت بحيث تكون الكمية بتغطي البصل، في ناس بكتّروا الزيت لدرجة يغمر البصل.. بس انا بكتفي بشويه.. اول ما يسخن نكب فيه البصل
bamya_1
اتأكدي ان الزيت حار عشان البصل لو نزل في زيت بارد حيطّلع مويه وتختلط بي الزيت ويأخد وقت أكتر عشان يتحمر ليك.. ما تشغلي نفسك بالتقليب كتير، امشي وتعالي كل دقيقتين حرّكيه.. اول ما يبدأ لون البصل يبقى اصفر.. يكون جاهز للخطوة البعدها
bamya_2
بعداك تكوني مغسلة لحمتك ومقطّعاها.. وتتأكدي انه ما فيها مويه.. تكبيها في البصله.. عشان تتحمّر بالزيت .. وتاخد من نكهة البصله .. قلبيها لحدي ما تبقى لونها رمادي.. ما بتكون استوت كده، لكن بتكون أخدت النكهة
bamya_3
الخطوة البعدها، الطماطم، لو عندك طماطمات لينات في التلاجة وما نافعين للسلطة، ممكن تقطعي منهم اتنين ما تقطعي صغار ما بحتاج.. او ممكن تستخدمي الطماطم المعلبة الجاهزة… انا بجيب قودي وبتكون قاعده في الدولاب لما احتاج ليها… تكبيها مع اللحمة، وخليها شوية من غير تحريك عشان تتحمّر بالزيت بتاخد نكهة عجيبة
bamya_4
الخطوة البعدها، سوطي الحاجات دي كلها مع بعضها وبعداك كبي ملعقة كبيرة كزبرة مطحونه، وحبة قرفة ناعمة وحبة هبّهان.. احنا بنكب البهار عشان زفارة اللحمة ما تظهر .. ونلقبهم بس حبّة سوا.. ونكب مويه لحدي ما تغمر اللحمة.. نقلب عشان الموية تتوزع في كل الحلة بي التساوي… ونخلي النار وسط، ونغطي الحلّة (ممكن نكون مستخدمين بريستو، نكبس الحلّة ونخيلها مسافة)، الهدف في المرحلة دي اننا ندي اللحمة فرصة تستوي.. لانه اللحمة بتاخد زمن عشان تستوي..
bamya_5
بعد نحس انه اللحمة استوت تلاته أرباع استوا كده، نطلع اللحمة ونستخدم الخلاط اليدوي عشان نخلط البصل والطماطم.. وبصراحة انا عشان ما أنظف هرّاسة التوم، بجدع فصوص التوم عشان تتخلط برضها.. الخطوة بتاعت الخلط اختياري، لكن بنصحكم بيها والله
bamya_6
بعداك نرجّع الحلة النار، ونكب ليها صلصة وملح وفلفل ونرجع اللحمة.. ونكب البامية المقمّعة، انا حقتي كنت مجهّزاها وخاتاها في الفريزر… ونسوطهم كلهم سوا.. اللحمة تتم استوى، البامية تستوي.. وأرخي النار تكون متوسطة..
bamya_7
كل شويه حرّكي، لو البامية لسه قويه، والمويه شويه، زيديها حبّة موية، لو لقيتيها استوت… ارخي النار شديييييد.. عشان بعد ده تتسبك بس.. يعني شنو تتسبك؟ يعني اي موية دخلت حلّتك، تتبخر.. كيف بنعرف انه الحلّة اتسبّكت؟ لما الزيت الزماااان داك حق البصلة وحق اللحمة يطفو فوق، ده البسموه وش الملاح… وصحة وهنا
bamya_final

6 responses to “طبيخ البامية

  1. الله يجزاك كل خير،، بصراحة اول مرة اعرف الاكلات السودانيه وباين من شرحك انك طباخه ماهره،، لكن للاسف بعض الكلمات مافهمتها

    إعجاب

    • اهلًا بك يا ام حمزة وشكرا على تعليقك.. لو في اي كلمة غير واضحة يمكنك سؤالي عنها ورح أوضّحها بكل سرور

      إعجاب

  2. هلا مدام مريم طبيخك جميل تسلم يدك… ساعديني لو سمحتي بالنسبه الباميه ألفي بلاد بره غير السودان ما بتكون لايوقه ولزجه زي حقتنا السودانيه.. دي يتعاملون معاها كيف.. وجزاكم الله خير

    إعجاب

  3. وعايزه اقول ليك ما شاء الله في التسبيكه استاذه.. وشرح مفصل ودمه خفيف تسلمي لينا

    إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s