كبكيك ملوّن من جوّه وبرّه.. اول تجربة لي مع ألوان الجلي.. حأشرح الطريقة وأقول عن خصائص الألوان دي.. عملتها لبتي في الروضة
اول حاجه استخدمته الكيك الجاهز بتاع بيتي كروكر.. مافيني حيل أبدا من البداية .. لياقتي خربانه الأيام دي.. تجربتي مع الجاهز حلوه وما حصل خذلني.. للكيك الملون بنعمل كيكة بيضاء عشان اللون يظهر.. الكيكة البيضاء بتعمل فيها بياض بيض بس.. دي احتاجت تلاته بياض بيض
الطريقة في الكرتونه ممكن بالخفاقه وممكن بالمضرب اليد.. بنضيف بياض تلاته بيضات وزيت ومويه… وبعداك الشي العملته اني قسمت العجين لتلاته أقسام.. واحد خليته ابيض والتأني عملته ازرق والتالت زهري.. عشان البنات في الروضة ياخدوا زهري والأولاد ياخدوا ازرق
نجي للألوان… لاقتني كتير اونلاين لكن اصله ما لقيتها في المحلات.. صدفه قبل يومين لقيتيها في محل عندنا في الدمام والخبر اسمه Nice اتشبّكته فيها.. ستة ألوان بي 65 ريال.. غالية لكن بتستاهل وبتقعد كتير.. يعني ما بتستهلكيها بسرعة
نقطة بسيييييطة كافية انها تلوّن ليك كمية كبيرة.. ميزتها انه الألوان بتفضل حلوه حتى بعد تنجض الكيكة… ولونها زاهي ومشرق… انا عملتها في الكيك وعملتها في الكريمة… لكن عندي عنها ملاحظه بقولها بعد شويه
نواصل في الكبكيك.. خليت لولو جهّزت لي صينية الكبكيك.. وبعداك في كل واحده ختيت ملعقتين عجين ابيض وملعقة من الملون.. وزي ما قلت، واحدات ازرق واحدات زهري..
طبعا الفكرة انه الكبكيك زاتها يكون فيها لونين.. ابيض ومعاه اما ازرق او زهري..مليت الكوب واحد لحدي تلتينه.. وبعد ده اتنفخت وبقت كبيرة
بعداك دخلتها الفرن.. اها في الفرن لاحظته انه الطبقة من فوق لونها ببهت شويييييه.. النقطة دي احبطتني لكن ما شديد..
لقيت لما لولو اكلت منها، اللون من جوّه حلو وزاهي… زي الصورة دي لواحده كانت فضل في النهاية قمت عملته اتنين فيهم اللونين سوا.. طلع اللون من جوه حلووووو
بعد طلّعته الكبكيك من الفرن وبرد تماماً، حفقته الكريمة المعاها.. وقسمتها قسمين.. كل قسم لونته بي لون.. وزّينت بيهم
مطبخ مريم الحسين 