طبيخ القرع

طبيخ القرع… اول مرّة اعمله.. لكن اعتقد مستوفي الشروط … لو حد عند اي رأي او تعليق يقول على طول..

gara3_final

طبيخ القرع المزبوط لازم اول شي يكون مسبّك، يعني ما تكون فيه مويه زايده، ويكون القرع ظاهر فيه ومحافظ على شكل، ما يكون مهروس… اها مشكلة القرع يلا انه بطلّع موية كتيرة.. وانه مفروض ما يتحرك كتير عشان ما يتهرس…

 

اوووووول خطوة تقطعي بصلك كتير عشان تكون عندك تسبيكة حلوه… نادر جايب لي بصل احمر غيّاظ… طاعم لكن صغاااار… قلت فرصة اوري العروسات المكنة البقطع بيها البصل… المكنة دي حنينه في سعرها، فيها عجانه وفيها تقطيع.. وسعرها في حدود ٦٥٠ ريال… وممكن العايزه تجيبها تضيع ليها اكسسوارات، عندها مفرمة لحمة ممكن تشتريها تركب فيها وعندها جك خلاط وعصارة برتقال كلها تجيبيهم بي راحتك لما تجتاحي ليهم.. صغيرونة ومختصرة وقوية.. ليها معاي أربعة سنين.. الماركة ألمانية اسمها بوش Bosch صناعتها تشيكية (كله ولا الصيني)

bosch

اها حشيت البصل سريع جدا (بستخدم الآلة لو عندي بصل صغار او عايزه احش بصل لكم طبخة).. ختيت الزيت في النار… للقرع احسن الحلة تكون عريضة عشان ما يتردم فوق بعض ويتهرس… الزيت لما يسخن، كبي البصل وقلبيه تمام لحدي ما يتبل.. وبعداك كبي طماطم مقطع وخليه لحدي ما الحموضة تروح.. اعملي حبة ملح وأرخي النار وامشي على القرع عشان تجهّزيه
gara3_1
يلا القرع نقشّرة ونقطعه مكعّبات متساوية قدر الإمكان عشان تستوي مع بعض ما تتهرس… واعملي مكعبات عريضة لانه هو قبل يستوي بكون قوي، لما يستوي ببقى طررررري… القرع برضه من الخضار البقعد كويس في التلاجة او الفريزر… لكن انا بفضل ينطبخ كتير ويقعد وهو مبطوخ.. برضه بقعد كويس في الفريزر وهو طبيخ.. الجزء اللين ألفيه البذور ده طلّعوه… وخلوا القرع مقطع جاهز …
gara3_3
البصلة ديك لو عايزنها كده خلوها، او اهرسوها.. حسب نوع البصل بتاعكم.. انا هرستها عشان اولادي وقصتهم مع الطماطم… اعملوا حسابك ما تزيدوا موية كتير… كبوا اللحمة واعملوا البهار… قرفة وكزبرة وحبة بابركيا وشمار الفول… الشمار ده رهيب في القرع… وكبوا اللحمة والقرع في نفس الوقت… نصيحة ماما فاطمة خالة نادر انه اخلي القرع واللحمة يستووا في نفس الوقت، مسافة اللحمة تنضج القرع بكون نضج
gara3_2
بعد ده القرع دخل، بقينا لازم نكون حريصيييين… بعد نغتّس كل مكعبات القرع في البصلة نعمل التوم والملح والفلفل.. لانه بعد شوية ما حيكون عندنا طريقة نضيف شي ونحرّك.. غطّي الحلة وأرخي النار وما تهبشيها تاني.. الهدف حسي انه القرع واللحمة يستوو..
gara3_4
اخر خطوة انه الطبيخ يتسبّك.. اكشفي الحلة واهبشي ليك قرعاية.. لو اتهرست معاناها انت كده تمام… خلي زيتك داك الكبيته يظهر بي فوق… كده طبيخك بقى جاهز… وبالهنا

2 responses to “طبيخ القرع

  1. السلام عليكم مريم

    ملاح القرع عملتو علي طريقتك ، طلع لذيييييذ و مسبك حلو

    يلا كنت عايزه استفسر منك ، وين القي مكينة بوش حقت تقطيع البصل الحمراء !? و اسمها الكامل شنو بالضبط

    علما اني في السعوديه

    إعجاب

    • تسلم الايادي يا سهى… بوش انا لقيتها قبل خمسة سنين في ساكو، لكن تاني شايفاها اختفت… الا تشوفيها عند الوكيل بتاعهم

      إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s