الكسره


قبل ما أبدا أحب احفظ لكل من ساعدني بي الأفكار لما نزلت البوست في سودانيز اونلاين… لولاهم ما كنت عرفته عملته شي… ومن قبلهم أمي الحبيبة.. علمتني من صغيرة أحب الكسره وشبّكت اولادي فيها.. وبقت مطلب شعبي في البيت عندي..

kisra_final

كسرتي ما كسرة اسطوات لسه.. لكن الحمدلله وقفنا كسره برّه وبقيت بعوس بقوة عين للضيوف… انا غايته بوريكم انا بعمل شنو.. وبستخدم شنو… وبعداك كل واحده تشوف ظروفها.. انا زوله في غربة ما كل الحاجات عندي، لكن اتصرّفته ودبّرته روحي ونجحت معاي.. الحمدلله

 

نبدأ بي حاجات الكسره… اول شي الصاج… انا بستخدم الصاج بتاع تيفال ده.. ساهل لي زول ما بعرف يعوس… وما بقيف ليك العجين… وما بضايقك وانت بتعوسي… وما بتحتاج للطايوق والمشاكل الكتيره دي (انا عندي طايوق حنكوش بوريكم ليه بعد شويه).. اسمه في المحلات صاج البيتزا… وسعره بالضبط 74 ريال.. بتلقي في محلات رامز او اي محلات مشابهه… وبتخت في البوتوجاز.. جربته حق الكهرباء عذبني في ظبطة النار .. لقيت ده اساسا بعمل فيه القرّاصة..
saj
الحاجه التانية القرقريبة…. دي حقوق الملكية لي أمي الله يديها العافية…واصلك ما بتتحيري تلقيها وين.. ده غير انه التنية دي بتخلي ليك العواسه سااااااهله…
gar
نجي للبعده… الطايوق.. وطبعا دي اي زول عاملني نكته فيه، لكن ولاااا شغلتي.. مدام حالي لي مشكلتي ما شغاله بيهم يضحكوا ويقولوا حنكوشه… حنكوشه وبعوس.. … البخاخ ده بمنع الإلتصاق.. وانا بستعمله مع البيض عشان ما اعمل زيت… بقوم أرشّه في الصاج للضمان… وبعداك بي منادل تيشوز … بمسح الصاج تمام.. وبعيد استخدام المناديل دي زاتها ما برميها… بتخلي الصاج تماااام الكسره تقوم ليك جاريه جري
tayog
اول حاجه العجين بحتاج خمّار… انا الخمّار اخدته من بت خالتي.. ما عملته براي… لكن بسمع النسوان بقولوا انه ممكن الزول يعمله بي الزبادي… تجيبي الدقيق حق الكسره (حأشرح أنواع الدقيق بعد شويه) تعجني بي شويه مويه ومعاه ملعقة كبيرة زبادي.. وتخليه برّه.. الهدف من الخمّار انه الكسره تكون فيها مزازه… كل ما زدناه، الكسره بتبقى خميره وكلما قللناه بتكون فطيره.. وممكن نسنغنى عدييييل عنه لو ناس بيتنا بدوروها فطيرة .. وبتطلع كسره زي العجب…الخمار تبيّتيه برّه لحدي ما تحسي بيه خمّر.. ختيه في التلاجه.. وطلعيه لمن تجي تعوسي….
يلا قبل العواسه بي ساعتين أقل شي (ده البعمله انا، يمكن التانيين ما بعملوا كده)، لكن انا لقيت انه العجين كل ما اتعجن بدري كل ما كان احسن… عندنا نوعين من الدقيق البتعملوا في الكسره ده الدقيق الاول.. والدقيق التاني هو دقيق القمح.. وعشان ما تخافوا من الاسم، ده الدقيق البنجيبه بنعمل بيه اي شي تاني.. لو عندك الكويتي او فوم يا ناس السعودية او اي دقيق متعدد الاستعمالات، ده هو دقيق القمح… النوعين ديل هم البعملهم في العجينة بتاعتي.. نجي نبدأ العجن..
بعد نقّه وكلام كتير في سودانيز اونلاين لقيت انه نسبة دقيق الذرة (حق العصيدة يا داليا) ودقيق القمح هي 3 لي واحد… يعني لو عايزه بي الكباية، تلاته كبابي دقيق ذرة، معاهم كباية دقيق قمح… تكبي ليهم من الخمار بتاعك حوالي نص كباية او اكتر أبدي بي نص وممكن بعد تعجني تضويقها عشان من طعمها تعرفي انت عايزه زيادة خمار ولا لأ… ابدي بي نص كباية.. بعداك كبي المويه… كبي وبي مضرب البيض الشبك (مافي زوي يجي يقول حنكوشه في النقطة دي بالله)، اضرب العجين.. لو ما انضرب ليك معناها الموية شويه.. كبي زيادة مويه.. قوام العجين مفروض انه ينضرب بي مضرب البيض بسهولة.. لكن برررضه ما تخافي بعدين بنصلّحه لو ما ظبط معاك حسي
حنخلي العجين ده ساعتين.. ما عشان يخمر.. لأ… عشان حبيبات دقيق الذرة (الدقيق بتاع الكسره والعصيدة)، بتكون كبيره.. وما بتبقى عجين تمام الا تاخد فترتها في المويه… عكس القمح ما بحتاج وقت كتير.. خلي عجينك ياخد وقته عشان لما تجي تعوسي ما يتعبك… بتكون الذرة ذابت، وبكون بقى متماسك.. لما تنتهي الساعتين كبي فيه ملح شويه… الملح الشباب في سودانيزاونلاين قالوا لو ختيناه من البداية الخمار ما بشتغل سريع…
يلا نجي للعواسه زاتها… جهّز حاجاتك كلها قريب ليك… وجيبي صينية وفرّشي فيها ورق الساندوتشات الشفاف البنلف بيه الساندوتشات عارفينو؟ البلفّو بيه ناس الشاورما ياخ؟ اكيد عرفتوه.. انا بفرش تلاته متقاطعات .. بعزل الرطوبة من الصينية وبمتصها من الكسره لما تجي تختيها.. برضه جهزي كوره فيها مويه عشان تختي فيها القرقريبه بعد تخلصي الطرقة… وطايوقك ومنديلك وولعي النار في الصاج…
خصصي كباية صغيرة عشان تقيسي بيها كمية العجين الحتعوسي بيه الطرقة…… يعني لو استخدمتي الكبابي المعياره في البداية اسهل ليك.. استخدمي الكباية مقاس نص كوب.. خلي النار تكون متوسطة عشان لو حاره شديد الكسره بتحمّر بي تحت (أنا دي لسه ما ظبطها تمام).. ولو النار بارده الكسره ما بتتجر معاك… أبدي عواستك وسمّي بي الله… الطرقة الاولى دي دايما صدقة انا بعتبرها … لسبب ما اصلها ما بتطلع سمحه…
نجي لسمك العجين، زي ما وعدته قبيل اننا حنظبطه… يلا واحده ظريفة والله اسمها أم المؤيد كتبت لي معلومة ذهبية، هي كانت مفتاح موضوع الكسره كله معاي… قالت لي لو كبيتي العجين في الصاج وقام عمل فقاقيع معناها موية العجين كتيره، زيديه حبّة دقيق قمح (عشان ما بياخد زمن عشان يذوب في المويه) دي الحاله الأولى.. الحالة التانية لو العجين تقيل، الطرقه ما بتمشي معاك وسريع بتعجّن.. معناها انت كترتي المحلبية، قصدي الدقيق… زيدي شويه موية… في البداية حتقعدي تزيدي دقيق ومويه لما تطمبجي الدنيا.. لكن اصلك ما تيأسي.. والله القصة اسبوع بالكتير وتلقي روحك يدّك مشت…

25 responses to “الكسره

  1. سلام عليكم .. يعني الخمار دا زاتو احتفظ بيهو واشبل منو حبة حبة؟؟ انا غايتو لي يومين بديت في السكرة دي والدقيق الخمرتو بعوسو كلو مابخلي منو هههههه

    إعجاب

    • هالة حبابك…. ايوه الخمار تشيلي منه شوية ما كلّه.. عشان كسرتك ما تكون خميرة شديد

      إعجاب

    • العزيزة هبة… تسلم ايدك وربنا يرحم والدتك ان شاء الله… الخمّار زي ما بسمع من النسوان انك ممكن تعجني دقيق بي موية وتديه ملعقة بتاعت زبادي او حبة خل زي ما قلت.. وتخليها بره التلاجة.. وحسب الجو، لو حر ممكن يوم واحد يكون جاهز لو برد ممكن يحتاج وقت أكتر… ما تضيفي ملح لانه الملح ببطيء التخمير.. وكده بكون الخمار جاهز

      إعجاب

  2. هلا بيك انا عندي خبرة في الأكل البلدي معترف بيها علي نطاق واسع هههه
    كنت متعمدة اني ما اتعلم الكسرة ﻻنو امي الله يرحمها علمتنا الكتير لكن كتنت بتقول لينا الكسرة شقاوة ما تتعلمها. لكن هسي قررت اني اتعلمها بس الخمار دا المشكلة . نحن ما بحبها مرة لكن مرات كده بتكون طاعمة بس بدون مرارة وبدون ماتكون فطيرة . السر وين قاعدة اسمع بالخل والخ
    رايك شنو

    إعجاب

  3. التنبيهات: البامية المفروكة | مطبخ مريم الحسين·

  4. التنبيهات: مقادير الكسرة بدقيق زادنا | مطبخ مريم الحسين·

  5. بحب الكسؤة شديد وهنا ف السعودية قدر ما اكون مشتهياها ما بلقاها وما لاقية اليعلمني ليها
    تسلمي كفيتي و وفيتي ح اجربا طوالي

    إعجاب

    • أيوه يا مي… بسموها الكسره الفطيره لو عملتيها بدون ذره… ناس السودان بياكلوها بالروب والسكر… لكن لكن ممكن تبدي بيها عشان تتدربي على العواسة…

      إعجاب

  6. تسلمي مريم
    طبعا جربت الطعمية بالفرن طلعت رهيييبة واهما شي ما تحسي بالذنب وانت بتاكلي فيها لانو مافيها زيت كتير
    تسلم يدك يا مبدعة

    إعجاب

  7. بس اعرف القرقريبه دي انتي عاملاها دي سفن اب حق البلاسيتيك والاعلبه الحديد مافاهمه وشكرا

    إعجاب

    • مرحب بيك يا منال، دي عملتها لي أمي من علبة السفن أب بتاعت الحديد، بتاعت البلاستيك ما بتنفع بتسيح ليك

      إعجاب

  8. شكرا يا عسل .لكين نفسي اعرف الكسرة البياكلوها باللبن دي بيعملوا عجينتا كيف .فتشت في النت ما لقيت الطريقة.لو نزلت طريقتا تكوني ما قصرتي

    إعجاب

    • اهلًا بيك يا شيرين، انت قصدك على الفطير، وده عواسته اسهل من الكسره، بتعجني دقيق قمح، نفس الدقيق بتاع اللقيمات ومعاه مويه وذرة ملح.. وتعوسيه زي الكسره بالظبط

      إعجاب

  9. شكرا ياعسل .بس عايزاك تكتبي لينا طريقة عجينة الكسرة البياكلوها باللبن لانو بحبها وفتشت في النت ما لقيت طريقتا وفي ناس بيسموها الفطير باللبن

    إعجاب

  10. تسلمي كتير على الجهد وجزاك الله خير.
    عندي تعليق بسيط علي بخاخ الزيت, مع الايام ببهدل ليك الصاج وحيبدا يلصق ليك, الافضل تمسحي زيت بمنديل 🙂 .

    Liked by 1 person

  11. شكرا يا ام لين.. صدقي سنين شغاله بيه ما عمل شي في الصاج… لكن فعلا لما ما يكون عندي بستحدم الزيت العادي.. بس بفضل البخاخ… اتعودته عليه

    إعجاب

  12. جزاك الله خير يا مريم بالجد كان عندي مشكلة في ضبط المقادير نسبة ١:٣ دي مع الخمار شطة بس
    اي زول سالتو يقول ليك المناسب😕
    وبالنسبة للقرقريبة عندي اسباتيولا سليكون قدرا بس اتحيرتا مرقتها من عصايتا واشتغلت بيها
    المهم جزاك الله خير وتتعلي م تدلي😘😘😘😘😘😘

    إعجاب

    • يا اهلًا يا ام محمود.. انا زاتي ام محمود ☺️.. انا النسبة دي حيّرتني فترة طويلة.. طوالي بسال ويقولوا ليك، تقدير 😅.. وفكرت الاسباتيولا ممتازة.. الله يديك العافية وتسلم اياديك

      إعجاب

  13. تسلم يدينك حبيبه طيعا الغربة بتعلم الواحد اي شي عشلن كدا قررت اتعلم الكسرة في الييت بس قصة المقادير دي حيرتني لانها مابتظبط البظبط معاي فقط الخمار بيطلع زي حق السودان ماشاءالله حاجرب الطريقة حقتك ويارب تظبط لي . دقيق الذرة هو الكورن فلور صح؟

    إعجاب

    • اهلًا يا ام فراس، لا، دقيق الذرة ده خاص بينا في السودان، ما بعرف اسمه عن الناس التانيين شنو، لكن حسب انت عايشه وين.. في دول الخليج مثلا متوفر في المطاحن، بس قولي ليهم دقيق كسره.. ولو ما لقيتيه، عوسي بالقمح ساي.. بطلع لايوق شويه، لكن بمشي الحال

      إعجاب

      • السلام عليكم بالنسبة لدقيق النشاء واحياناً بيسموه (مكاده ) نحن في الشماليه بيعوسوه كسره للملاح بي نسبة واحد من الذره المكاده لواحد من القمح

        إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s