دي بنعتبرها وجبة للاسرة كلها ما الأطفال براهم.. بتطلع هششششششه زي حقت المطاعم.. ولزيزه شديد.. بناكلها من غير خبز ومعاها الصوص وسلطة خضراء…
الطريقة: نجيب صدور دجاج ونغسلها ونقطعها أصابع متساوية قدر الإمكان
ي كيس نكب حوالي كوب دقيق معاه ملعقة كبيرة ملح وملعقة كبيرة توم بودره ونتاكد انهم اتخلطوا سوا، بعداك ندخل جواه الدجاج ونربط الكيس، ونهززززز
نجيب بيض، بمعدل بيضه لكل صدر، يعني لو قطعتي أربعة صدور اكسري أربعة بيضات اضربيهم معاها حبة ملح ونقطة خل عشان الزفارة.. وغمسي الدجاج لحدي ما يندمج كله في البيض
بعداك نجيب البقسماط الياباني اسمه بانكو، رهيب في التحمير ده شكل الكيس البجيبه.. حباته كبيره وبيضاء بتخلي الحاجه الحمرناها مقرمشة ولونها حلو
نطلع الدجاج من البيض وتغمسه في البقسماط (ختوه في صحن غريق عشان تقدروا تغمسوا الدجاج كويس)، ونخلص من الكمية كلها عشان تكون جاهزه للتحمير
بعداك نحمره في زيت وسط، ما بالضرورة يكون غزير.. واهممممم شي في التحمير انه ما نقلب كتير.. نخته من الجهه الاولى على نار وسط، لحدي ما يبدأ لونه يحمر تقلبه بالجهة التانية.. لما لونه يحمر.. نطلعه.. وبكون نجيييض وطري ومقرمش من بره
بنقدمه مع صلصة العسل او honey mustard .. عبارة عن ملعقتين كبار مايونيز معاهم ملعقة صغيرة مسطرد ونص ملعقة صغيرة عسل وحبة ملح،. نسوووطهم سوا لحدي ما يندمجوا..
مطبخ مريم الحسين 
رهييبة ح اجربها في القريب العاجل ان شاءالله..زوجي امبارح قال نفسو في دجاج بالعسل ^^ وانا ماحصل عملتو ولا عارفة لي ليهو طريقة..لكن بجرب دا وبدعي ليك..بالتوفيق
إعجابإعجاب
وصفة الدجاج بالعسل براها… يوم بنزلها ليك… لكن الوصفة دي لو زوجك بحب الدجاج، لطيفة جدا وحتعجبه ان شاء الله.. بشّريني لما تعمليها
إعجابإعجاب