كيكة البرتقال

ضربوا ناس قالوا جايين يشربوا معاي شاي المغرب قمت عملته لي كيكة بسيطة، وقلت اشرح الوصفة للعندهم مشكلة في عمل الكيك..

اول حاجه في الخلاطة بتاعتك… تلاته بيضات، كوب سكر كوب زيت وكوب حليب… برتقالة كامله مقشرة، وحبة فانيليا… نضررررررربهم في للخلاط اقل شي خمسة دقائق

بعداك نكب الخليط في كوره وبي مضرب الشبك نكب كبايتين دقيق وملعقة كبيرة باكينج بودر… نكب الدقيق على دفعات، ونحرك الخليط لما الدقيق يختفي… اوووووعك من السواطة الكتيرة… لو سطتي كتير ألهوا الدخل اثناء الخلط، بطلع… والدقيق بلبّك مع السوائل وكيكتك بتعجن

بعد تنتهي طوالي كبي ٩٠٪ من العجين في صينيتك بتاعت الكيك… وخلي شويه… كبي معاها ملعقة صغيرة كاكاو… وبي مضرب الشبك زاتو حرّكي… ما تكتري الكاكاو عشان ما يبقى ليك ناشف بعد يتخبز والكيكة تتشقق… كبي الكاكاو فوق عجينك الأبيض… وبي نخاسة الأسنان لا مؤاخذة، سووووطي عشان يطلع ليك الشكل ده

حركة الكاكاو دي ما ضروري، ممكن تكبي عجينك كله… وتدخليها الفرن طوالي واطلع ليك ألذ كيكة

نجي للفرن

متذكرين قبيل لما بنخلط الحاجات في الخلاط، اها في الوقت داك بتكوني ولعتي فرنك حار على اعلى درجة عشان يسخن…لما تنتهي من الصينية، تدخليها الفرن وتخليه حار.. الباكينج بودر عشان يشتغل وينفخ ليك الكيكة محتاج حراره.. اول عشرة دقائق خلي الفرن حار، بعداك تعمليه ١٨٠… وتخليها لمدة ٢٠ دقيقة…

يلا بعداك بكون كده الكيكة حسب القالب وحسب الفرن، يا استوت، يا قرّبت تستوي… الفترة ديك كلها ما بنفتح الفرن نهائي وإلا حتهبط.. لكن بعد ما تتم النص ساعة الاولى دي (١٠ دقائق حار و٢٠ دقيقة على ١٨٠)، ممكن نفتح الفرن ونعاين ليها، ونجيب سكينة نغرسها، لو طلعت نظيفة معناها كيكتك نجضت أطفئ الفرن وطلعيها، لو طلع فيه عجين، خليها لسه…

دي صورة قديمة لنفس الكيكة.. البرتقالة كان لونها اصفر شديد، برتقالة أمس كان لونها فاتح كده