يتوشيني ألفريدو بالدجاج.. طبعا فيتوشيني ده اسم المكرونه الطوال زي الاسبجيتي لكن بتكون شرايطها عريضة شوية… ألفريدو ده الصلصة البيضاء البتتعمل معاها.. زمان كنت بعمل الصلصة البيضاء دي بشاميل سائلة شويه، بعداك عرفته وصفتها من موقع سمسماية ومسكته فيها (www.simsimaya.com).. وعشان تكون فيها حاجه بروتين بعمل معاها صدور دجاج…
الطريقة، اول حاجه بنقطع صدور الدجاج لمكعبات صغيرة.. الصدور مناسبة لانه مافيها دهن، والوصفة دي نهائي ما محتاجه زياده دهون… … بعداك في حلّة نكب الدجاج المقطع ومعاه ملعقة كبيرة زبدة وتلاته فصوص توم مدقوقات… ونحركهم سوا لحدي ما الدجاج يستوي..
بهّروها بي ملح وفلفل واستمروا في التحريك طوالي عشان التوم ما يبقى زي القدحة.. احنا عايزين نكهته من غير ما يتحمّر… الدجاج ما بياخد وقت كتير ينجض.. بالكتير ٤ دقايق حيكون استوى.. بي طرف الملعقة اعفصي ليك واحده، لو اتقسمت معناها خلاص بقت تمام… نزليه في صحن وحاولي الزبدة ما تنزل معاك بقدر الإمكان
في حلّتك زاتها (موش قلت ليكم جنّي وجن العدّة الكتيره)، كبي كباية كريمة طبيخ وملعقة بتاعت زبده تانية وملح وفلفل وختيهم في النار وامشي وتعالي حرّكيه لحدي ما الزبدة تذوب… لو ما عندك كريمة (على ذمة سمسماية) اعملي تلاته أرباع كوب حليب وربع كوب قشطة…
مسافة تذوب الزبدة في الكريمة، أبشري جبنة بارميزان ا.. انا زمان كنت بشتري المبشورة جاهز.. لكن لقيت دي فرق كبير جدا.. اهم شي انها بتسيح وبتمط زي الموزيريلا ونكهتها أقوى بكتير واقتصادية لانه حته من دي كافية.. بعملها في البيتزا.. ومع المكرونه.. في الوصفة دي حنستخدم كمية اكبر حبة… تقريبا كوب وربع مبشورة
كبي الجبنة ولو عندك جبنة رومي او تشيدر او في جبنة لزيزه شديد اسمها قشقوان.. كبيهم في الكريمة بعد الزبدة تذوب.. وسوطيهم سوا.. الجبنة طوالي بتسيح.. اقفلي النار وكبي فيهم الدجاج داك
زي ما قلت القوام بكون تقيل.. ولما تبرد ببقى القوام اتقل… خليه في الحلة واسلقي المكرونه.. لو وطوالي كبيهم سوا وقدميهم.. لانه المكرونه بتشرب الصوص يعني ما بتقعد فيها كتير
المكرونه يا قول صفية قريبتي ما تهردوها.. اسلقوها بعدد الدقائق المكتوبة في الصندوق.. وفي مويه كتيره وصفّوها.. كده البياكل بشبع من غير ما يأكل كتير.. لكن لو اتهردت، بتتبلع ساي …
مطبخ مريم الحسين 