الرجلة المسبّكة بتبدا باختيار الرجلة من السوق.. بعض الصور دي قديمة حأحاول اشرح بقدر الإمكان.. احنا بنحب الرجلة بي صلصة بسيطة.. لكن الطريقة ياها زاتها.. نبدأ
اول شي نختار الرجلة الصفقها صغار وأخضر… وتكون جديدة ومفرهده وخدرتها يانعة.. الصفقها صغار نكهتها قوية وطاعمة… نجيبها البيت وبتكون عادة على شكل رُبط صغيرة.. الرجلة بتحتاج غسيل شديد لانها بتكون مليانه تراب.. نغسلها وننشفها ونحشها.. ولاني بصراحة طريقة تقطيع امّاتنا الزمان ديك ما بعرفها، بختها في قطاعة الخضار ويقطعها اول بالسكين وبعداك بنعمها بي مفرمة الملوخية .. وبقسمها على أكياس وبخليها مفطحة وعلى الفريزر (شوفو الصورة).. كده ما بتاخد مساحة في الفريزر وما بتاخد وقت عشان تسيح (طريقة امّي الله يديها العافية)، بنفس الطريقة بفرزن الشمار الأخضر والبقدونس والدكوة بتاعت السودان والتوم المهروس
الخطوة البعدها تقطعي بصلك لكن يكون صغار.. مربعات عشان ما تخلطي.. وتقلبيه في زيت ومعاه اللحمة والطماطم برضها صغار … وبعداك كبي العدس معاهم عشان ياخد من نكهتهم
نفصل شويه في موضوع العدس… تغسلي العدس وتصفيه من المويه (بتغسل كم مره لحدي ما مويته تبقى شفافه) ونكب لكل تلاته ربطات رجلة، كباية ونص عدس… العدس انا بديه فرصة يتقلب في الزيت مع البصل واللحم والطماطم لحدي ما لونه يبقى فاتح بعداك بكب موية تغمره.. اعملي حسابك المويه ما تكتر لانه الرجلة بتنزل موية… بعد يجقجقوا سوا على نار هادية لمدة عشرة دقائق نكب الرجلة… لاحظوا الرجلة بتنزل موية والعدس بمتص الموية الشطارة خلال الفترة الجاية دي انه المويه تكون موجوده عشان العدس يستوى، وأنها ما تزيد شديد عشان ما تاخد وقت تتسبك… لاحظو احنا عايزين العدس واللحمة يستووا
لما يستووا نكب بهاراتنا، كزبرة وحبة قرفة وهبهان وشمار مسحون.. وتوم وصلصة… ولو عندنا شمار اخضر نكب حوالي أربعة ملاعق كبار مفرومات… ونخليهم يتسبكوا لحدي ما زيت البصلة القبيل داك يطلع بي فوق… وممكن نعمل معاهم قدحة… في النهاية في حركة اتعلمتها من عمّة اولادي، وهي انها بتكب خيط بتاع زيت سمسم من فوق الرجلة، بديها نكهة دمااااار… الصور دي من الشتاء القبل الفات، كان عندنا هوس الطبيخ بي الكانون
مطبخ مريم الحسين 